Vol. 433 No. 6
4 D'fhiafraigh Mr. Molloy den Aire Ealaíon, Cultúir agus Gaeltachta an ndéanfaidh sé ráiteas faoin gcúis nach gceadóidh sé oifigeach óna Roinn chun gníomhú mar Rúnaí don Chomhchoiste don Ghaeilge; agus an bhfuil a fhios aige go bhfuil an cinneadh seo ag cur isteach go mór ar obair an Chomhchoiste.
D'fhonn teacht i gcabhair ar an gComhchoiste Oireachtais don Ghaeilge táim sásta anois, tar éis dom athbhreithniú a dhéanamh ar an gceist, oifigeach de chuid mo Roinne a chur ar fáil mar Chléireach don Chomhchoiste ar bhonn páirtaimseartha amhail mar a bhíodh á dhéanamh go dtí seo. Tá scéal dá réir á thabhairt d'Oifig Thithe an Oireachtais.
An chéad rud is féidir liom a rá ná, buíochas le Dia. Tá cumhacht na ceiste parlaiminte le feiceáil sa fhreagra agus ba mhaith liom mo bhuíochas a ghabháil leis an Aire ach, ag an am céanna, cuireann sé ionadh orm gur chuir sé cosc ar an phost seo a líonadh ón chéad lá riamh. Ní cóir go dtarlódh sé ach, os rud é gur tharla sé agus go bhfuil an cheist socraithe anois, glacaim leis seo.
Tá mé buíoch den bhuíochas — más ceadmhach dom é a chur mar sin — a nocht an Teachta Molloy. Is feasach dom an tábhacht a bhaineann le hobair an comhchoiste, mar bhí mé féin in mo bhall de tráth ach tuigeann an Teach na deacrachtaí a bhí ann dom. An t-oifigeach seo, tá sé faoi réir chúraimí an Tí seo. Chomh maith leis sin tá crúog oibre ar m'fhoireann laistigh den Roinn agus, ag an am céanna, tá orainn socruithe a dhéanamh leis an Roinn Airgeadais. Ach, tar éis athbhreithniú a dhéanamh ar an cheist ar fad, cheap mé go raibh obair an Chomhchoiste chomh tábhachtach sin — agus tá sé mar pholasaí agam úsáid na Gaeilge a leathnú i dTithe an Oireachtais — gur shocraigh mé ar an chinneadh a dhéanamh.
Thug an tAire freagra níos leithne ansin ach ag an am céanna ba mhaith liom buíochas a ghabháil leat féin, a Cheann Comhairle, as ucht na cabhrach a thug tú don Chomhchoiste seo agus, is dócha, murach an chabhair sin b'fhéidir nach mbeadh an réiteach seo ann.
