Skip to main content
Normal View

Dáil Éireann debate -
Thursday, 7 Dec 1995

Vol. 459 No. 5

Written Answers. - Stádas Oifigiúil Ghaeilge.

Robert Molloy

Question:

42 D'fhiafraigh Mr. Molloy den den Tánaiste agus Aire Gnóthaí Eachtracha an gcuirfidh sé in iúl cad tá á dhéanamh ag a Roinn chun stádas oifigiúil don Ghaeilge a bhaint amach san Aontas Eorpach; cén caidreamh atá déanta aige leis an Roinn Ealaíon, Cultúir agus Gaeltachta; agus an ndéanfaidh sé ráiteas ina thaobh. [15770/95]

Mar is eol don Teachta, bunaíodh stádas na Gaeilge san Aontas Eorpach mar theanga ina bhfuil na Conarthaí ar fáil sa bhliain 1973, ar dhul isteach dúinn sa Chomhphobal Eorpach. Cuirtear córas na dteangacha in iúl go reachtúil in Ionstram na Comhairle. Ní áirítear an Ghaeilge mar "theanga oifigiúil agus oibre de chuid an Aontais" san Ionstram sin. Mar sin féin, ba cheart a mheabhrú, gur féidir Gaeilge a úsáid i gcásanna sa Chúirt Bhreithiúnais, agus, i gcúinsí áirithe, is féidir ráitisí a dhéanamh i nGaeilge sa Phairlimint Eorpach.

Is féidir go mbeidh ceist chóras na dteangacha i measc na gceisteanna a bheas le plé ag an gComhdháil idir Ionadaithe na mBallstát (CIB) i 1996. Toisc gur cheist achrannach í, agus toisc gur gá do na baillstáit bheith d'aon ghuth ag an gComhdháil idir Ionadaithe na mBallstát, tá seans ann nach ndéanfar aon athrú sontasach maidir le córas na dteangacha ag an CIB. Ach, má phléitear córas na dteangacha ag an CIB, agus má bhíonn deis ann stádas na Gaeilge a fheabhsú sa chomhthéacs seo, tá sé d'intinn ag an rialtas beartas oiriúnach a chur chun cinn. Thug Teachta Gay Mitchell, an tÁire Stáit um Ghnóthaí Eorpacha, le fios i láthair an Grúpa Machnaimh, a bhuail le chéile in ullmhúchán don CIB, go mb'fhéidir go luafaidh Éire ceist na Gaeilge ag an CIB i gcomhthéasc aon díospóireachta faoi chóras na dteangacha.

Tá beartas glactha ag an Rialtas feabhsaithe praicticiúla in úsáid na Gaeilge san Aontas Eorpach a bhaint amach agus nach gá le haon athrú ó thaobh an Chonartha de. Tá staidéar déanta ag mo Roinn ar stádas na Gaeilge san Aontas Eorpach a léiríonn roinnt feabhsaithe praicticiúla sodhéanta i bhfabhar úsáid níos leithne don Ghaeilge. Tá an staidéar seo seolta agam go dtí an tAire Ealaíon, Cultúir agus Gaeltachta, ag a bhfuil príomh-dhualgas sa cheist seo. Moladh a luaitear i staidéar mo Roinne ná go méadófar uimhir na doiciméadaí a aistrítear go Gaeilge.
Sa chomhthéacs seo, táim an-shásta a rá gur glacadh lenár n-iarrtas go n-aistreófar Tuairisc an Ghrúpa Machnaimh, a cuirfear i láthair ag an gComhairle Eorpach i Maidrid an tseachtain seo chugainn.
Top
Share