Vol. 483 No. 6
351 D'fhiafraigh Mr. McGinley den Aire Ealaíon, Oidreachta, Gaeltachta agus Oileán an eol di an droch-bhail atá ar an chéibh ag Mucrois i gCill Chártha agus an bhfuil aon phleananna le hoibreacha deisiúcháin a dhéanamh ansin. [21538/97]
Tá cóip de thuairisc ghinearálta ar chéibheann Dhún na nGall a d'ullmhaigh an chomhairle chontae agus a léiríonn na hoibreacha deisiúcháin agus feabhsúcháin atá de dhíth ag Cé Mhucrois, faighte ag mo Roinnse.
Níl iarratas ar chúnamh i leith oibreacha ag na gcé seo faighte ag mo Roinnse. Ar ndóigh, is gnó do Chomhairle Chontae Dhún na nGall obair chothabhála a chur i gcrích ag an gcé seo.
352 D'fhiafraigh Mr. McGinley den Aire Ealaíon, Oidhreachta, Gaeltachta agus Oileán an dtuigeann sí na deacrachtaí maidir le calaíocht ag Machaire Rabhartaigh i nDún na nGall agus an bhfuil aon phleananna le cúrsaí a fheabhsú ansin. [21539/97]
Tá na féidearthachtaí maidir le feabhsú na saoráidí calaíochta ag Machaire Rabhartaigh á scrúdú ag mo Roinnse i gcomhairle le Roinn na Mara agus Acmhainní Nádúrtha le tamall. Mhol an Roinn sin go bhfostófaí speisialtóirí comhairleoireachta chun staidéar a dhéanamh ar an trá agus ar an gcladach ag Machaire Rabhartaigh agus ar phiara Mhachaire Rabhartaigh agus chun moltaí a dhéanamh maidir le feabhsú na saoráidí calaíochta ann.
Tuigim gur cheadaigh an Coiste Idir-Ranna Comhordaithe um Fhorbairt Oileán deontas £50,000 do Chomhairle Chontae Dhún na nGall ar 11 Meán Fómhair 1996 i leith staidéar féidearthachta ar mhóroibreacha forbartha ar an gcé. Íocadh £34,582 den deontas sin le an gComhairle Chontae ar 31 Nollaig 1996. Chomh maith leis sin cheadaigh an Coiste Idir-Ranna deontas £30,000 ar 11 Aibreán 1997 chun obair dheisiúcháin a dhéanamh ar an sleamhnán ann.
