Dáil Éireann debate -
Tuesday, 9 Mar 1999

Vol. 501 No. 6

Written Answers. - Scéim na mBóithre Áise.

Pádraic McCormack

Question:

92 D'fhiafraigh Mr. McCormack den Aire Ealaíon, Oidhreachta, Gaeltachta agus Oileán cén méid airgid a tugadh do gach Gaeltacht faoi scéim na mbóithre áise i 1998; an chaoi ar toghadh gach ceann; agus an ndéanfaidh sí ráiteas ina leith. [6902/99]

Minister of State at the Department of Arts, Heritage, Gaeltacht and the Islands (Éamon Ó Cuív)

Is suim £500,000 a bhí ar fáil dom faoi scéim na mbóithre áise i 1998. Roinneadh an soláthar sin de réir daonra na Limistéar Gaeltachta sna contaetha Gaeltachta éagsúla mar a leanas:

Contae	Soláthar (a)	Caiteachas go 31-12-98
	£	£
Dún na nGall	139,000	139,000
Maigh Eo	66,000	66,000
Gaillimh	207,000	(b) 190,000
Ciarraí	47,000	46,845
Corcaigh	21,000	18,300
Port Láirge	10,000	9,640
An Mhí	10,000	(c) 15,000
An tIomlán	500,000	484,785

(a)Rinneadh coigeartú beag ar na suimeanna i gceist le go bhfeadfar suim £10,000 a chur ar fáil i gcás na gcontaetha le daonra beag (An Mhí agus Port Láirge).

(b)Tá oibreacha fós le críochnú.

(c)Bhain £10,000 den chaiteachas le hoibreacha a raibh cúnamh ceadaithe ina leith faoin scéim i 1997.

D'ullmhaigh Stiúrthóirí Áitiúla mo Roinne-se, tar éis dóibh dul i gcomhairle leis na comhairlí contae iomchú, na liostaí bóithre bunaithe ar na critéir seo, go mbéadh an bóthar ag freastal ar a laghad ar theach cónaithe amháin móide úinéir talún amháin; i gcás bóithre portaigh go mbéadh an bóthar ag freastal ar a laghad ar 20 líon tí; riachtanas; costas; agus stádas na Gaeilge sa cheantar.

Toisc go raibh sábháil i gcodanna eile de Vóta mo Roinne-se, bhí ar mo chumas soláthar breise a chur ar fáil do scéimeanna feabhsúcháin sa Ghaelacht ag druidim le deireadh na bliana anuraidh. As an soláthar sin, ceadaíodh cúnamh i leith tograí éagsúla tar éis dul i gcomhairle leis na comhairlí contae iomchuí. As an gcúnamh a ceadaíodh, íochadh £210,000 san iomlán i leith bóithre áise, mar a leanas:

Contae
	£
Dún na nGall	51,000
Maigh Eo	*3,000
Gaillimh	94,400
Ciarraí	48,000
Corcaigh	14,000
Port Láirge	–
An Mhí	–
Iomláin	210,400

*Ceadaíodh cúnamh £36,800 ach níor eílíodh ach £3,000 roimhe deireadh 1998.