Vol. 557 No. 2
213 D'fhiafraigh Mr. Sargent den Aire Oideachais agus Eolaíochta an nglacann sé leis go mbíonn ceisteanna filíochta róchasta do scoláirí Ardteistiméireachta ag an nGnáthleibhéal agus nach dtuigtear go minic iad agus dá bharr sin, an gcuirfidh sé béim amach anseo ar chumas cumarsáide atá in oiriúint do shaol na Gaeilge sa lá atá inniu ann. [21806/02]
Ní ghlacaim leis go mbíonn na ceisteanna filíochta róchasta diarrthóirí Ardteistiméireachta a bhíonn ag gabháil don Ghnáthleibhéal sa Ghaeilge. Ní ghlacaim leis ach oiread nach dtuigtear na ceisteanna filíochta ar na scrúdpháipéir go minic.
Mar is léir ó Ghearrthuairisc an Phríomhscrúdaitheora ar Scrúdú na hArdteistiméireachta: Gnáthleibhéal-Gaeilge (ATGL-Gaeilge) 2000, ó Thuairisc an Phríomhscrúdaitheora ar ATGL-Gaeilge 2001 atá foilsithe ag mo Roinn, agus ó Ghearrthuairisc an Phríomhscrúdaitheora ar ATGL-Gaeilge 2002, déirigh thar cionn le hiarrthóirí Gnáthleibhéil na ceisteanna filíochta ar na scrúdpháipéir a thuiscint agus a fhreagairt sna blianta sin. 38 marc nó 69% an meánmharc a gnóthaíodh ó thaobh na filíochta de i 2001. De réir Ghearrthuairisc an Phríomhscrúdaitheora ar ATGL-Gaeilge 2002, déirigh níos fearr ná sin arís le hiarrthóirí ó thaobh na filíochta de i 2002.
Ó tharla gur siollabas cumarsáideach atá i gceist déantar gach iarracht freastal ar an gcumarsáid i ngach gné den siollabas, an fhilíocht san áireamh. Rinne an Coiste Cúrsa – Gaeilge na hArdteistiméireachta – (de chuid na Comhairle Náisiúnta Curaclaim agus Measúnachta, CNCM) moladh, cúpla bliain ó shin, an méid próis agus filíochta a bheadh le déanamh ag iarrthóirí do chúrsaí na hArdteistiméireachta a laghdú le hionú a thabhairt do mhúinteoirí breis ama a dháileadh ar an nGaeilge labhartha agus ar chumas cumarsáide na n-iarrthóirí. Sa siollabas nua seo, leagtar béim ar thábhacht na scileanna teanga (Éisteacht, Labhairt, Léamh agus Scríobh) agus ar mháistreacht orthu maidir le gnáthGhaeilge fheidhmiúil chumarsáideach a úsáid i gcomhthéacs gnéithe éagsúla de ghnáth-thopaicí laethúla i saol comhaimseartha na ndaltaí agus, ina theannta sin, leagtar béim áirithe ar thábhacht an chultúir Ghaelaigh.
