Trevor Sargent
Question:105 D'fhiafraigh Mr. Sargent den Aire Gnóthaí Pobail, Tuaithe agus Gaeltachta cé na moltaí ó Choimisiún na Gaeltachta atá curtha i bhfeidhm go dtí seo. [8349/03]
Written Answers - Coimisiún na Gaeltachta.
Brian O'Shea
Question:140 D'fhiafraigh Mr. O'Shea den Aire Gnóthaí Pobail, Tuaithe agus Gaeltachta cén dul chun cinn atá déanta maidir le cur i bhfeidhm mholtaí Choimisiún na Gaeltachta; agus an ndéanfaidh sé ráiteas ina leith. [8338/03]
Question:
147 D'fhiafraigh Mr. O'Higgins den Aire Gnóthaí Pobail, Tuaithe agus Gaeltachta an bhfuil aon chinneadh déanta aige i dtaobh theorainn na Gaeltachta; agus an ndéanfaidh sé ráiteas ina leith. [8340/03]
Tá sé i gceist agam Ceisteanna Uimh. 105, 140 agus 147 a thógáil le chéile.
Beidh a fhios ag Teachtaí gur bhunaigh mé coiste comhairleach i mí Dheireadh Fómhair 2002 le comhairle a chur orm maidir leis na gníomhaíochtaí a theastaíonn le feidhm phraiticiúil, mar is cuí, a thabhairt do mholtaí atá déanta i dtuarascáil Choimisiúin na Gaeltachta. Ag eascairt as comhráití a bhí ag an gcoimisiún le déanaí, tá cinneadh déanta agam staidéar cuimsitheach teangeolaíoch a thionscnamh maidir le húsáid na Gaeilge sa Ghaeltacht. Beidh an staidéar seo mar bhunús d'fhorbairt theangeolaíoch na Gaeltachta mar cheantar ina labhraítear an Ghaeilge mar ghnáth-theanga agus chun athbhreithniú a dhéanamh ar theorainneacha na Gaeltachta.
Tá na saintéarmaí tagartha don staidéar seo á réiteach ag mo Roinn faoi láthair, ag tógáil tuairimí an choiste chomhairligh san áireamh, agus tá sé i gceist tairiscintí a lorg don staidéar tríd an ngnáthchóras i leith tairiscintí poiblí chomh luath agus is féidir.
I measc ábhar agus tionscadal eile atá á bplé nó á gcur chun cinn ag an gcoiste comhairleach, tá: tionchar teangeolaíoch pholasaí pleanála sa Ghaeltacht; moltaí i ndáil le plean gníomhaíochta le cur ina luí ar thuismitheoirí na buntáistí a bhaineann le húsáid na Gaeilge mar phríomhtheanga teaghlaigh sa Ghaeltacht; aighneacht maidir le gnéithe criticiúla a mbíonn tionchar acu ar úsáid na Gaeilge sa chóras bhunoideachais agus iarbhunoideachais sa Ghaeltacht; moltaí i ndáil le hathstruchtúrú an chórais réamhscolaíochta sa Ghael tacht; moltaí maidir le struchtúr nua d'eagrais óige sa Ghaeltacht, agus athbhreithniú scéimeanna a bhfuil tionchar suntasach acu maidir le cur chun cinn na Gaeilge sa Ghaeltacht, eadhon, scéim labhairt na Gaeilge agus scéim na gcúntóirí teanga.
Chomh maith leis seo tá tús curtha ag mo Roinn le comhráite le roinnt Ranna Rialtais ábhartha maidir le saincheisteanna a eascraíonn as obair an choiste chomhairligh.
Ar ndóigh, ní mór a aithint go mbrathann rath na hoibre seo trí chéile cuid mhaith ar chomhoibriú a bheith ar fáil ó na páirtithe leasmhara uilig a bhfuil baint acu le ceist na Gaeilge sa Ghaeltacht, go háirithe an pobal Gaeltachta agus na Ranna Stáit agus eagrais éagsúla a bhfuil feidhm acu inti agus freagrachtaí dá réir orthu.