Dáil Éireann debate -
Wednesday, 25 Jun 2003

Vol. 569 No. 4

Written Answers. - Roads Projects.

Tom Hayes

Question:

96 D'fhiafraigh Mr. Hayes den Aire Gnóthaí Pobail, Tuaithe agus Gaeltachta an ndéanfaidh sé ráiteas faoi scéimeanna feabhsúcháin sa Ghaeltacht chun feabhas a chur ar bhóithre straitéiseacha agus ar bhóithre áise agus faoin laghdú mór airgid atá ann i mbliana. [217852/03]

Minister for Community, Rural and Gaeltacht Affairs (Éamon Ó Cuív)

Faoi na Scéimeanna Feabhsúcháin a riarann mo Roinnse, bíonn deontais chaipitil ar fáil chun muiroibreacha sa Ghaeltacht a fhorbairt, chun bóithre sa Ghaeltacht a fheabhsú (idir bóithre stratéiseacha agus bóithre áise), agus chun áiseanna ar nós hallaí pobail, páirceanna imeartha agus áiseanna eile a chur ar fáil nó a fheabhsú. Tá go leor forbairtí curtha chun cinn sna ceantair Ghaeltachta le cabhair ó na Scéimeanna Feabhsucháin, go háirithe le cúpla bliain anuas. Tá sé mar sprioc ag mo Roinnse, leis an airgead atá ar fáil do 2003, cur le hinmharthanacht phobal na Gaeltachta agus, da bhrí sin, an Ghaeilge a neartú agus a bhuanú sa Ghaeltacht.

Tá suim €10.294m ar fáil do mo Roinnse i mbliana le haghaidh oibreacha feabhsúcháin sa Ghaeltacht agus tá mé sásta go gcuirfidh an maoiniú sin go mór le forbairt teangeolaíochta, cultúrtha, sóisialta, fisiciúil agus eacnamaíoch na Gaeltachta. Cé go bhfuil cosúlacht ann ar an gcéad léamh gur laghdú é sin ar an soláthar €12.9m a cuireadh ar fail sna Meastacháin do 2002, ní mór a a thabhairt san áireamh go raibh ar mo chumas airgead breise a chur ar fáil do na Scéimeanna Feabhsúcháin sa chuid dheiridh de 2002, rud a chiallaigh go raibh caiteachas iomlán €16.553m orthu faoi dheireadh na bliana. Má chuirtear an tsuim €16.553m sin leis an soláthar de €10.294m do 2003, feicfear go bhfuil tacaíocht ag leibhéal €13.42m ar an mheán in aghaidh in bliana á cur ar fáil do na Scéimeanna Feabhsúcháin thar an tréimhse de dhá bhliain atá i gceist.

Ní miste a lua freisin gur léir ó na figúirí sa Tábla leis seo, atá á chur thart sa Tuairisc Oifigiúil, go bhfuil ardú mór tagtha ar chaiteachas faoi Scéimeanna Feabhsúcháin mo Roinne le cúig bliana anuas agus tá mé lán-sásta go mbainfear amach na spriocanna atá ag mo Roinn faoin bPlean Náisiúnta Forbartha. Maidir le bóithre Gaeltachta, tá pleananna dhá bhliain aontaithe anois ag mo Roinn leis na húdaráis áitiúla sna ceantair Gaeltachta chun cabhrú leo na hoibreacha atá i gceist a dhéanamh go héifeachtach.

Scéimeanna Feabhsúcháin Gaeltachta

Caiteachas Caipitil 1998-2002

	1998	1999	2000	2001	2002
	€	€	€	€	€
Bóithre	616,000	3,592,000	8,486,000	11,458,000	10,189,000
Uisce/Séarachas	43,000	33,000	27,000	29,000	21,000
Muiroibreacha	1,955,000	2,316,000	2,754,000	1,852,000	4,395,000
Hallaí/Coláistí	447,000	537,000	494,000	642,000	1,019,000
Áiseanna Caitheamh Aimsire	1,260,000	480,000	592,000	748,000	929,000
Iomlán	4,321,000	6,958,000	12,353,000	14,729,000	16,553,000