Dáil Éireann Debate, Tuesday - 23 November 2004
427 D’fhiafraigh Mr. Gogarty den Aire Oideachais agus Eolaíochta cé mhéad páiste a lorg áit i rang na naíonán beag i scoileanna i Leamhcán sna blianta 2002, 2003, 2004, agus an luafaidh sí an figiúr le haghaidh gach scoile. [29756/04]
View answer428 D’fhiafraigh Mr. Gogarty den Aire Oideachais agus Eolaíochta cé mhéad áiteanna i rang na naíonán beag a chuir scoileanna i Leamhcán ar fáil sna blianta 2002, 2003 agus 2004, agus an luafaidh sí an figiúr le haghaidh gach scoile. [29757/04]
View answer429 D’fhiafraigh Mr. Gogarty den Aire Oideachais agus Eolaíochta cé mhéad páiste a mheasann an tAire a bheidh ag lorg áite i rang na naíonán beag i scoileanna i Leamhcán sna blianta 2005, 2006 agus 2007. [29758/04]
View answerTá sé beartaithe agam Ceisteanna Uimh. 427, 428 agus 429 a fhreagairt le chéile.
Tá naoi mbunscoil i Leamhcán. Ba é líon iomlán na naíonán beag a bhí rollaithe sna scoileanna sin ar fad i 2004 ná 671 dalta. Cé go léiríonn sé seo go bhfuil ardú de 118 áit ar áiteanna ó fhigiúirí Mheán Fómhair 2002, níl mo Roinnse ar an eolas maidir le haon leanbh nach raibh ar a c(h)umas rochtain a fháil ar áit i Leamhcán le trí bliana anuas. Is mar gheall ar na gníomhartha tapa agus cinntitheacha a ghlac an rannóg pleanála scoileanna i mo Roinnse é seo. Bhí infheistíocht de €17.5 milliún mar thoradh ar na gníomhartha seo chun soláthar bunoideachais a chur ar fáil agus a uasghrádú sa cheantar seo, atá ag forbairt go tapa.
Áirítear ar mhionsonraí na ngníomhartha a glacadh tionscadail thógála ar tugadh fúthu ag scoil shóisearach Scoil Áine agus Scoil Shinsearach Naomh Tomás. Cuireadh dhá scoil nua 16 seomra ranga ar fáil do scoil náisiúnta Educate Together Leamhcáin agus scoil náisiúnta Educate Together Griffeen Valley. Sa bhreis air sin, tá tús curtha le tógáil fhoirgneamh nua scoile chun atheagrú ar scoileanna náisiúnta Ardeaspag Ryan a éascú chun scoil shóisearach agus scoil shinsearach a bhunú. San idirthréimhse, tá socruithe déanta do sholáthar cóiríochta sealadaí fad is a bheidh an foirgneamh nua á thógáil.
Tá mo Roinnse ag déileáil go cuimsitheach le riachtanais Leamhcáin, agus leanfaimid ag déanamh athbhreithnithe ar chúrsaí ansin. Ar an mbealach seo tá mo Roinnse sásta go mbeifear in ann socruithe tráthúla breise a dhéanamh más gá chun freastal ar éilimh bhreise a d'fhéadfadh a theacht chun cinn ann.
430 D’fhiafraigh Mr. Gogarty den Aire Oideachais agus Eolaíochta an eol di nár freastalaíodh in am ar an 154 pháiste a chláraigh le haghaidh oideachais bunscoile trí Ghaeilge i Leamhcán don scoilbhliain 2004-05 toisc gur diúltaíodh don iarratas le haghaidh Gaelscoile nua; an eol di, toisc an diúltaithe sin, nár freastalaíodh ar 82 de na páistí seo; an eol di gur mhol coiste comhairleach a Roinne féin gur chóir aitheantas a thabhairt do Ghaelscoil nua anuraidh sa chás nach mbéadh an Ghaelscoil reatha in ann freastal a dhéanamh ar an éileamh; ós rud é nach bhfuil an scoil reatha in ann freastal a dhéanamh ar an éileamh de bharr easpa spáis agus an fháis ollmhóir sa daonra, an bhfuil sé i gceist aici aitheantas a thabhairt do Ghaelscoil nua, a thosóidh i Meán Fómhair 2005, sa cheantar. [29759/04]
View answerDiúltaíodh iarratas níos luaithe i 2004 do Ghaelscoil nua i Leamhcán ar an moladh a rinne coiste comhairleach na scoileanna nua. Rinneadh an cinneadh ar an mbunús go bhféadfaí an soláthar Gaeilge a bhí i Leamhcán cheana a leathnú chun freastal ar éilimh bhreise a thiocfadh chun cinn. Rinne pátrún na scoile beartaithe achomharc ar an gcinneadh seo. Níor éirigh leis an achomharc a stiúraigh bord achomharc neamhspleách.
Tá freastal á dhéanamh ar an éileamh do sholáthar lán-Ghaeilge i gceantar Leamhcáin leis an leathnú atáthar a dhéanamh ar an nGaelscoil atá ann. Maidir leis seo, tá sé cinnithe go leathnófar an scoil go dtí scoil 24 seomra ranga a thiocfaidh ó thaobh méid le réimse méideanna na scoileanna sa cheantar seo, atá ag forbairt go tapa.
Le deireanaí, d'éiligh údaráis bhainistíochta na scoile go mbeadh an leathnú teoranta d'ocht seomra ranga breise. Tá sé seo á bhreithniú laistigh de mo Roinnse i láthair na huaire. Gné thábhachtach ina leith sin is ea an leibhéal éilimh atá ann. Má thagann éileamh sa bhreis ar dhá ionchur seomra ranga chun cinn, comhsheasmhach le prótacal caighdeánach, is é an chéad rogha ná an soláthar atá ann a leathnú. Maidir leis sin, tá sé cinnithe go bhfuil an suíomh sách mór chun freastal ar scoil 24 seomra ranga.
Tuigim go bhfuil fógra foirmiúil faighte maidir leis an rún iarratas a dhéanamh ar aitheantas do Ghaelscoil nua sa cheantar, a thosódh ag feidhmiú i Meán Fómhair 2005. Tá an fógra rúin curtha ar aghaidh chuig coiste comhairleach na scoileanna nua lena bhreithniú. Pléifidh an coiste leis an ábhar, agus déanfaidh an coiste, ar an ngnáthshlí, a chuid moltaí liomsa ar an ábhar sin ag tráth níos deireanaí.
