Dáil Éireann Debate, Wednesday - 13 March 2013
16. D'fhiafraigh Deputy Brian Stanley den Aire Ealaíon, Oidhreachta agus Gaeltachta cén dul chun cinn atá déanta ó thaobh maoiniú a thabhairt le hionad oidhreachta a thógáil ag Teach an Phiarsaigh in am do chomóradh 100 bliain Éirí Amach na Cásca. [13099/13]
View answerTuigim go bhfuil plé ar siúl le cúpla bliain anuas chun ionad cuairteoirí a fhorbairt ag suíomh Theach an Phiarsaigh i Ros Muc. Mar thoradh ar na cainteanna idir na páirtithe éagsúla, lena n-áirítear mo Roinn, an Roinn Comhshaoil, Pobail agus Rialtais Áitiúil, Oifig na nOibreacha Poiblí agus Údarás na Gaeltachta, aontaíodh tabhairt faoi ionad cuairteoirí a fhorbairt gar do Theach an Phiarsaigh. Bunaíodh grúpa idir Oifig na nOibreacha Poiblí agus Údarás na Gaeltachta chun an tionscnamh a chur chun cinn. Is é an aidhm atá leis an gcomhoibriú seo ná maoiniú a aimsiú don fhorbairt, an obair thógála a bhainistiú agus socruithe a dhéanamh chun an tionad a bhainistiú ach é a bheith tógtha.
Tuigtear dom ó Údarás na Gaeltachta go bhfuil an tionscnamh tugtha chuig staid réamhphleanála ag an ngrúpa seo agus go bhfuil sonraíochtaí iomlána ullmhaithe do na foirgnimh atá molta. É sin ráite, tuigtear dom nach bhfuil foinsí maoinithe aimsithe don tionscnamh go fóill.
17. D'fhiafraigh Deputy Caoimhghín Ó Caoláin den Aire Ealaíon, Oidhreachta agus Gaeltachta cé mhéad duine breise atá tar éis pacáiste na scéime tacaíochta teaghlaigh a ghlacadh ón am seo an bhliain seo caite; an dtabharfaidh sé briseadh síos ar cá háit a bhfuil na daoine sin lonnaithe ar bhonn contae agus ar bhonn Gaeltachta; cén costas a bhí ar an scéim go dtí seo; agus cén tslat tomhais atá ag an Aire chun a chinntiú go bhfuil na teaghlaigh seo ag úsáid na Gaeilge go laethúil. [13097/13]
View answerTá pacáiste tacaíochta á chur ar fáil ag mo Roinn do thuismitheoirí mar cheann de na bearta atá á gcur i bhfeidhm mar chuid den Chlár Tacaíochta Teaghlaigh a sheol mé i mí Aibreáin 2012. Tá sé mar aidhm ag an bpacáiste tacaíochta tacú níos fearr le teaghlaigh Ghaeltachta atá ag súil le páiste agus a dteastaíonn uathu a bpáistí a thógáil le Gaeilge, chomh maith le teaghlaigh Ghaeltachta atá ag tógáil páistí réamhscoile le Gaeilge nó gur mhaith leo a bpáistí réamhscoile a thógáil le Gaeilge. Is ar theaghlaigh de bhunadh na Gaeltachta atá an tionscnamh seo dírithe go príomha, cé go n-aithnítear go bhfuil éileamh ar an bpacáiste tacaíochta chomh maith lasmuigh den Ghaeltacht.
Go nuige seo, tá 639 pacáiste dáilte ar theaghlaigh, lena n-áirítear 173 chuig seoltaí poist sa Ghaeltacht, 450 chuig seoltaí poist eile in Éirinn agus 16 seolta chuig teaghlaigh thar lear. Tá infheistíocht €30,389 déanta go dtí seo sa tionscnamh. Is léir, mar sin, go bhfuil éileamh suntasach ar an bpacáiste agus go bhfuil cuid mhaith den éileamh sin ag teacht ón nGaeltacht.
Níor mhiste a nótáil go bhfuil rath an chláir i ndeireadh báire ag brath ar mhian agus ar thoil an phobail féin. Leanfaidh mo Roinn, i gcomhar leis na páirtithe leasmhara, le gach iarracht is gá a dhéanamh - laistigh de na hacmhainní atá ar fáil – d'fhonn a chinntiú go n-ardaítear feasacht phobal na Gaeltachta faoin gceist agus go spreagfar tuismitheoirí dá réir chun an Ghaeilge a roghnú mar theanga teaghlaigh.
