Chun pleanáil a dhéanamh le haghaidh sholáthar scoile agus anailís a dhéanamh ar na sonraí déimeagrafacha ábhartha, déanann an Roinn seo an tír a roinnt ina 314 limistéar pleanála scoile agus baineann sí úsáid as Córas Faisnéise Geografaí, ag úsáid sonraí ó raon foinsí, lena n-áirítear sonraí maidir le Sochar Leanaí agus rollú scoile, chun a fháil amach cá háit a mbeidh an brú ar áiteanna scoile ar fud na tíre agus nuair a bheidh cóiríocht bhreise scoile de dhíth ag leibhéal bunscoile agus iar-bhunscoile.
Nuair a thugtar le fios sna sonraí go bhfuil gá le soláthar breise ar leibhéal bunscoile nó iar-bhunscoile, bíonn seachadadh na forála breise sin ag brath ar chúinsí áirithe gach cáis agus is féidir í a sholáthar trí cheann amháin, nó trí mheascán díobh seo a leanas:
- An acmhainn neamhúsáidte atá ann cheana a úsáid laistigh de scoil nó scoileanna,
- Acmhainn scoile nó scoileanna a leathnú,
- Scoil nó scoileanna nua a sholáthar.
Bunaítear scoileanna nua mar fhreagairt ar éileamh déimeagrafach mar a shainaithnítear iad trí anailís den sórt sin. Léirítear sna réamh-mheastacháin is déanaí ón Roinn seo an t-éileamh laghdaithe ar áiteanna bunscoile i limistéar pleanála scoile Chill Droichid, ach leanfar ag athbhreithniú na riachtanas.
Mar is eol don Teachta, ó Aibreán 2018, d’fhógair mo Roinn pleananna chun 47 scoil nua a bhunú lena n-áirítear bunscoileanna i Léim an Bhradáin, Maigh Nuad, agus sa Nás. Tá na scoileanna i Léim an Bhradáin, agus i Maigh Nuad curtha ar bun cheana féin agus is Gaelscoil í an scoil i Maigh Nuad faoi phátrúnacht An Foras Pátrúnachta. Cinnfear pátrúnacht agus teanga an teagaisc don scoil nua sa Nás trí phróiseas pátrúnachta as seo amach.
Rinneadh an próiseas um Athchóiriú Scoileanna don Éagsúlacht a fhorbairt d’fhonn dlús a chur le seachadadh scoileanna ilchreidmheacha ar fud na tíre. Is éard atá i gceist leis an bpróiseas Athchóirithe seo aistriú scoileanna atá ann cheana féin seachas samhail chónasctha agus / nó dúnta an phróisis maidir le dífheistiú pátrúnachta. Soláthraíonn an próiseas deiseanna do scoileanna ilchreidmheacha breise i nGaeilge nó i mBéarla. D’fhéadfadh roinnt scoileanna Béarla iarracht a dhéanamh aistriú go Gaelscoil sa chomhthéacs sin.
