Dáil Éireann díospóireacht -
Wednesday, 25 May 1994

Vol. 443 No. 2

Ceisteanna—Questions. Oral Answers. - Muiroibreacha ar Oileáin Árann.

Robert Molloy

Ceist:

13 D'fhiafraigh Mr. Molloy den Aire Ealaíon, Cultúir agus Gaeltachta an bhfuil a fhios aige faoin imní atá ar mhuintir Inis Meáin agus ar mhuintir Inis Oírr, Oileáin Árann, toisc an méid ama atá á thógaint chun an dá chéibhe a thógáil ar na hoileáin sin; agus an bhfuil sé ar intinn aige beart a dhéanamh chun a chinntiú go gcríochnófar obair thógála ar na céibheanna laistigh de dhá bhliain mar má tá moill ar an obair seo, beidh drochéifeacht ar chúrsaí eacnamaíochta na n-oileán.

Mr. M. Higgins

Ba í an aidhm a bhí ann ó thús — agus thuig muintir na n-oileán é sin — ná an obair ar an mhórscéim mhuiroibreacha ar Inis Meáin agus ar Inis Oírr a chríochnú faoi dheireadh an tsamhraidh/an fhómhair 1995. Seasann an aidhm sin i gcónaí.

Ag féachaint don dochar a d'fhéadfadh a bheith ann don tionscal turasóireachta ar Inis Oírr mar gheall ar na hoibreacha mara a bheith ar siúl, thug mé cead do Roinn na Mara le déanaí chun fad breise 10.25 méadar a chur leis an bpiara atá ann cheana féin, ar chostas measta £100,000. Ciallaíonn sé seo go mbeidh báid farantóireachta bheaga in ann teacht i dtír fad is a bheidh na móroibreacha ar siúl. Ar ndóigh, beidh an bád mór "Oileán Árann" in ann teacht i dtír chomh maith.

Táthar ag súil leis i gcónaí go gcríochnófar an mhórscéim ar an dá oileán laistigh den tsuim £4.5 mhilliún atá údaraithe ina leith.

Táim lánsásta, mar a dúirt an tAire Stáit, go mbeidh an caiteachas seo ina chabhair mhór do mhuintir na n-oileán. Chuir mé an suim de £100,000 ar fáil ionas nach mbeadh Inis Oírr thíos leis fad is a bhí an obair ar suíl.

Miss Quill

Gabhaim buíochas leis an Aire as ucht a fhreagra ach tá cúpla rud ann gur mhaith liom a ardú. Luadh na hathruithe atá á dhéanamh ar an chéad phlean a bhí ann don cé ag Inis Oírr. Sa phlean atá ann faoi láthair tá fad breise á chur leis an cé. An bhfuil an t-airgead breise don fhad bhreise sin curtha i láthair go fóil? Bhí mé i láthair ag Meastacháin Roinn na Mara inniu agus bhiómar ag plé ceiste den tsórt seo le Aire na Mara, an Teachta Andrews. Dáiríre, ní fiú tráthnín an méid airgid atá i Meastacháin na bliana seo d'fhorbairt cuan agus d'fhorbairt cé. An bhfuil an £100,000 a luadh sa mhála, mar déarfadh an Taoiseach?

Mr. M. Higgins

Is féidir liom a rá leis an Teachta go bhfuilim báúil leis an iarratas atá aici ach ní féidir tógaint ón deascéal atá ann do mhuintir Inis Oírr. Beidh 10.25 méadar á chur leis an seanché, mar sin beidh áis ann. Chomh maith leis an caiteachas ar an mhórscéim tá muintir an oileáin an-sásta faoi seo. I ndeireadh na dála tiocfaidh mo chomhleacaithe sa Dáilcheantar sin, an Teachta Molloy ina measc, ar an tuairim gur maith an rud é do mhuintir Inis Oírr. Chomh maith leis sin tá mo Roinn, an Roinn Ealaíon, Cultúir agus Gaeltachta ag cur an t-airgead ar fáil le go ndéanfadh Roinn na Mara an obair seo.

Tá dhá mhilliún punt curtha ar fáil i mbliana do na móroibreacha agus tá áthas orm a rá go bhfuil an £100,000 ar fáil. Rachaidh an obair ar aghaidh agus ní chuirfear as do mhuintir Inis Oírr fad a bhíonn na móroibreacha atá riachtanach agus sásúil dóibh, ar siúl.

Miss Quill

Níor fhreagair an tAire mo cheist go beacht. An bhfuil an tsuim airgid a luaigh me, an £100,000, i Meastacháin na bliana seo.

Mr. M. Higgins

Tá sé deacair a rá an bhfuil an Teachta ag plé Meastachán Roinn na Mara nó Meastachán mo Roinn-se. Ní dóigh liom go dtuigeann sí an tslí a tharlaíonn sé seo.

Is as meastachán mo Roinn-se a thagann an £100,000 agus is í Roinn na Mara a dhéanfaidh an obair.

Miss Quill

An bhfuil an t-airgead ar fáil do Roinn na Mara don bhliain seo?

Mr. M. Higgins

Tá agus tá na litreacha scríofa. Da mba rud go mbeadh duine ag útamáil ar feadh bliana ní fhéadfaí é seo a shéanadh. Tá an t-airgead curtha ar fáil, beidh Roinn na Mara ag déanamh na h-oibre. Tárlóidh sé.

Miss Quill

An féidir leis an Aire a rá cathain a chuirfear críoch leis an obair seo. Cathain a mbeidh an dá ché nua ag feidhmiu?

Mr. M. Higgins

Táimid ag caint faoin dá ché mhór agus táimid ag caint sa tríú áit faoin leathnú ar an seanché. Dúirt mé i mo fhreagra go bhfuilimid sásta cloí leis na spriocdátaí a bhí againn ó thús. Mar sin ní chuirfear moill ar an obair.

Miss Quill

Níor luaigh an tAire mí nó bliain nuair a luaigh sé spriocdáta. Tá spriocdáta i bhfad ró-leathan domsa.

Mr. M. Higgins

Tá sé luaite. Dúirt mé mar shampla samhradh nó fómhar. Fiú dá mbeifí ag cur teach beag suas, bheifí ag brath ar an aimsir. An féidir linn bheith níos beaichte? Dár ndoigh, níl dada faighte anois ag na daoine a bhí ag scaipeadh ráflaí éagsúla ag rá go mbeadh muintir Inis Oírr míchompordach fad a bhí an obair ar siúl. Tá an t-airgead curtha ar fáil chun freastal ar na deacrachtaí gearrtréimseacha agus ar na deacrachtaí fadtréimhseacha. Tá a lán infeistíochta eile le déanamh ar na hoileáin agus beidh muintir na n-oileán áthasach. Tá an Rialtas seo ar an mbealach ceart.

Miss Quill

Más maith, is mithid.