Vol. 450 No. 1
3 D'fhiafraigh Mr. Molloy den Aire Ealaíon, Cultúir agus Gaeltachta an gcuirfidh sé in iúl cé mhéad cóipeanna de FÍS a foilsíodh, Earrach 1995, costais fhoilsithe an leabhair seo; cén fáth ar foilsíodh é; agus an ndeéanfaidh sé ráiteas ina thaobh. [4744/95]
10,000 cóip a foilsíodh d'eagrán an Earraigh de FÍS, nuachtlitir nua mo Roinne-se, a bheidh á cur ar fáil ar bhonn ráithiúil as seo amach.
Níl na billí go léir a bhain leis an bhfoilsiú glanta go fóill ach measter gur costas clódóireachta thart ar £3,600 a bheidh i gceist san iomlán. Chomh maith leis sin, meastar gur costas thart ar £4,900 a bheidh ar an obair a bhain le dearadh na nuachtlitreach, cé nach miste a rá gur obair nach mbeidh le déanamh arís a bhí i gceist i gcás a cuid mhór de sin.
Is í aidhm na nuachtlitreach ná eolas a chur ar fáil faoi chúraimí agus ghníomhaíochtaí mo Roinne-se, ní amháin do na dreamanna éagsúla a bhíonna ag plé linn ar bhonn oifigiúil ach don phobal i gcoiteann. Tá mise lán-sásta go bhfuil an aidhm sin ag teacht go hiomlán leis an ngealltanas atá sa Chlár le haghaidh Rialtais Athnuachana féachaint chuige go mbeadh teacht i bhfad níos easca ag an bpobal ar eolas faoi ghníomhaíochtaí an Stáit.
Ní miste a lua go bhfuil an chuid is mó de na hailt sa nuachtlitir ag freagairt d'éilimh suntasacha ón bpobal — agus go deimhin ón Teach seo — ar eolas níos cuimsithí faoi na hábhair a bhí i gceist. D'fhéadfainn Teilifís na Gaeilge, tionscal na scannán nó struchtúr agus feidhmeanna mo Roinne a lua mar shamplaí de sin.
De réir an eolais atá tugtha don Teach ag an Aire, ó thaobh clódóireachta agus dearaidh de, tá costas £8,500 ar an leabhar seo FÍS, gan a chur san áireamh cá mhéad a chosnaíonn an páipéar agus an cháipéis a scaipeadh-d'fhéadfá a rá go bhfuil, b'fhéidir, suas go dtí £10,000 i gceist ar fad. Ba mhaith liom a fhiafraí den Aire, an fiú an méid sin airgid a chaitheamh ar fhoilseachán den sórt seo. Nuair a léann tú é feiceann tú go bhfuil a lán pictiúr ann — an raibh sé riachtanach 17 bpictiúr den Aire féin a fhoilsiú sa leabhar seo——
Gan aon taispeántas mar gheall ar na pictiúir.
Gan aon taispeántas?
Sea — display.
Tá sé i mo láimh. Tá sé soiléir nuair a bhreathnaíonn tú air go bhfuil an méid sin pictiúr ann, idir chinn le Gaeilge agus Béarla, agus nuair a chuireann tú san áireamh an pictiúr den fhoireann atá i lár an fhoilseachain, tá 17 bpictiúr den Aire ann. An gceapann sé go bhfuil sé ceart airgead Stáit a chaitheamh ar ego trip den sórt seo?
B'fhéidir go bhfuil an ceart agat, a Cheann Comhairle, nach bhfuil sé ceadaithe taispeántas a dhéanamh i leith eagráin thábhachtaigh mar seo, ach tá se léirithe ag an Teachta Ó Maoilia — agus tá mé buíoch de — go bhfuil an t-eagrán ar fáil i mBéarla agus i nGaeilge. Níl a fhios agam conas is féidir grianghraf a thógáil i nGaeilge agus ceann eile a thógáil ar bhealach eile i mBéarla, ach tá mé ag súil leis an eolas sin. Chun freagra a thabhairt maidir leis an eolas a bhí sé á lorg uaim, bhíomar tar éis Roinn nua a bhunú agus a lán nithe nua a dhéanamh. Mar shampla, cuireadh tús le cúrsaí scannánaíochta agus físe agus bhí baint agam féin lena lán de na gníomhartha sin. Ar ndóigh, maidir leis na heagráin a fhoilseofar amach anseo, beidh siad ag plé le oifigigh eile i mo Roinn agus, má bhíonn suim ag an Teachta beith páirteach linn chun na haidhmeanna atá fúinn a bhaint amach, beidh spás ann dó féin sna grainghraif. Maidir leis an méid a dúirt sé faoi na grianghraif den fhoireann tá tábhacht ag baint leo. Tá sé ceart go mbeadh aithne ag an bpobal, ní amháin ar ainmneacha, ach ar na daoine a mbíonn siad ag plé leo agus atá i gceannas ar na foranna i mo Roinn. Is beartas maith é agus tá mé lánsásta go bhfuil an t-éileamh chomh mór sin ar an eagrán.
An bhfuil dualgas air gan airgead Stáit a chur amú, agus, an aontóidh sé liom, nuair a fheiceann duine grianghraf amháin tuigeann sé cad é atá ann. Mar fhreagra ar an gceist a thóg sé féin, ní gá pictiúr a fhoilsiú le Béarla agus ansin an ceann céanna arís le Gaeilge. Is é an pictiúr céanna é agus ar chostas £10,000, d'fhéadfaí tithe a dheisiú sa Ghaeltacht agus a lán rudaí eile. Cén fáth, a Aire, nach raibh aon tagairt do thograí sa Ghaeltacht nó dul chun cinn sa Ghaeltacht, seachas Teilifís na Gaeilge.
Mar fhreagra sciobtha air sin, ní rabhamar ach ag plé le gnéithe áirithe d'obair na Roinne. Tá réimse mór gníomhartha ar siúl ag an Roinn. Mar shampla, scríobhfar ailt ar chúrsaí oidhreachta agus, sna heagráin amach anseo, beidh plé chuimsitheach ar chúrsaí eile agus is fhéidir leis an Teachta bheith ag tnúth leis an gcéad eagrán eile.
