Vol. 498 No. 1
307 D'fhiafraigh Mr. McGinley den Aire Ealaíon, Oidhreachta, Gaeltachta agus Oileán an eol di go bhfuil páirteanna de cheantar Gaeltachta Chloich Cheann Fhaola nach bhfuil fáil fós acu ar Theilifís na Gaeilge; agus cé na pleananna atá ann chun a chinntiú go mbeidh fáil ar an tseirbhís sa cheantar Gaeltachta sin gan a thuilleadh moille. [26850/98]
Baineann an cheist atá ardaithe ag an Teachta le gnáth-fhreagrachtaí Údarás RTE ó lá go lá agus níl aon fheidhm reachtúil agam sa chás.
Mar sin féin, tá mé sásta, i gcomhréir le seanchleachtais, eolas atá faighte agam ó RTE, mar fhreagra ar cheisteanna sonracha a cuireadh orthu i ndáil le feabhas a chur ar an bhfáil atá ar sheirbhísí chraolacháin náisiúnta RTE, a chur ar fáil don Teach.
Tuigim ó RTE go raibh i gceist, sular cuireadh tús le Teilifís na Gaeilge, tarchuradóir a lonnú ag an bhFál Carrach agus go raibh dhá láithreán aimsithe i gceantar Choich Cheann Fhaola ach gur diúltaíodh cead pleanála ar dhá ócáid ar leith. Tuairiscíonn RTE anois go bhfuil an tríú láithreán ceannaithe faoi réir cead pleanála a fháil agus, má cheadaítear a leithéid, go mbeifear in ann tarchuradóir a lonnú ann do Theilifís na Gaeilge laistigh d'achar gearr.
