Dáil Éireann díospóireacht -
Tuesday, 21 Oct 2003

Vol. 572 No. 6

Written Answers. - Bille na dTeangacha Oifigiúla 2002.

Trevor Sargent

Ceist:

85 D'fhiafraigh Mr. Sargent den Aire Gnóthaí Pobail, Tuaithe agus Gaeltachta an spreagfaidh sé údaráis áitiúla agus náisiúnta chomh maith le lucht gnó agus pobail, comharthaí cruinne Gaeilge a úsáid i dtreo is go mbeidh pobal dátheangach tógtha faoi dheireadh thiar thall. [24042/03]

Dinny McGinley

Ceist:

98 D'fhiafraigh Mr. McGinley den Aire Gnóthaí Pobail, Tuaithe agus Gaeltachta cén dul chun cinn atá déanta aige chun Bille na dTeangacha Oifigiúla 2002 a chur i bhfeidhm agus cathain a cheapfar Coimisinéir na dTeangacha Oifigiúla. [24135/03]

Eamon Gilmore

Ceist:

143 D'fhiafraigh Mr. Gilmore den Aire Gnóthaí Pobail, Tuaithe agus Gaeltachta cén méid post a chuirfear ar fáil sa roinn phríobháideach leis an mBille Teanga a chur i bhfeidhm ina iomláine; agus an ndéanfaidh sé ráiteas ina leith. [24044/03]

Minister for Community, Rural and Gaeltacht Affairs (Éamon Ó Cuív)

Tógfaidh mé Ceisteanna Uimhir 85, 98 agus 143 le chéile.

Mar is eol do na Teachtaí, tá Acht na dTeangacha Oifigiúla ina dhlí ó mhí Iúil 2003. Is é príomhchuspóir an Achta ná soláthar níos mó de sheirbhísí i nGaeilge a chur ar fáil ón seirbhís phoiblí ar chaighdeán níos airde.

Maidir leis an gceist faoi chomharthaíocht, tugtar cumhacht don Aire faoin Acht rialacháin a dhéanamh maidir le húsáid na Gaeilge, nó na Gaeilge agus an Bhéarla, ar chomharthaí, ar fhógairtí béil, ar stáiseanóireacht agus ar fhógraí. Tá sé i gceist agam na rialacháin cuí a dhéanamh san athbhliain agus cinnte beidh mé ag súil leis go mbeidh feabhas suntasach le teacht sar i bhfad ar an méid Gaeilge agus ar chaighdeán na Gaeilge a bheidh le feiscint ar chomharthaíocht bóithre agus a leithéid.

Maidir le cur i bhfeidhm an Achta go ginearálta, tá réamhobair nach beag déanta nó idir lámha cheana féin ag mo Roinn. Ó ritheadh an tAcht i mí Iúil seo caite, scríobh mo Roinn go dtí na comhlachtaí poiblí atá i gceist – thart ar 650 ina iomlán – le cóip den Acht agus achoimre ar na príomhfhorálacha. Tá próiseas idir lámha freisin faoina dtugann oifigigh de chuid mo Roinne-se cur-i-láthair do chomhlachtaí poiblí maidir le himpleachtaí an Achta dóibh, tráth a bhíonn deis chun tuilleadh eolais a thabhairt agus saincheisteanna a phlé.

Agus an tAcht á chur i bhfeidhm ag comhlachtaí poiblí, is féidir bheith ag súil leis go gcruthófar postanna i gcúrsaí traenála, aistriúcháin agus mar sin de san earnáil phríobháideach ach, ar ndóigh, ní cheist domsa mar Aire meastachán a thabhairt ar an méid postanna a d'fhéadfadh a bheith i gceist thar tréimhse ama. Is cinnte, áfach, go mbeidh gá tarraingt ar inniúlacht teanga ó go leor daoine sna hearnálacha poiblí agus príobháideach araon chun go gcuirfear an tAcht seo i bhfeidhm ina iomláine.

Bunófar oifig choimisinéir na dteangacha oifigiúla chun faireacháin a dhéanamh ar chomhlíonadh an Achta ag comhlachtaí poiblí agus chun féachaint chuige go gcuirfear é i bhfeidhm. Tá mé ag súil leis go mbeidh an oifig bunaithe go luath i 2004 agus tá an réamhobair atá riachtanach idir lámha ag mo Roinn faoi láthair.