Dáil Éireann Debate, Tuesday - 20 March 2018
1093. D'fhiafraigh Deputy Peadar Tóibín den Aire Cultúir, Oidhreachta agus Gaeltachta cathain go díreach a bhunófar ionad Gaeilge agus cultúir i lár chathair Bhaile Átha Cliath mar atá fógraithe sa phlean náisiúnta, 2040 agus an dtabharfaidh sí cur síos ar an amscála atá ag an Roinn faoi láthair leis an togra seo a bhaint amach. [12713/18]
Amharc ar fhreagraMar áta luaite sa Phlean Forbartha Náisiúnta, Tionscadal Éireann 2040, tá i gceist ionad Gaeilge agus cultúir a fhorbairt i lár chathair Bhaile Átha Cliath. Anuraidh, cuireadh coiste le chéile le hionadaíocht ó mo Roinn féin, ó Fháilte Éireann, ó Chomhairle Cathrach Átha Cliath agus ó Chonradh na Gaeilge le breathnú ar an bhféidearthacht ceannáras an Chonartha ag 6 Sráid Fhearchair, Baile Átha Cliath a fhorbairt mar lárionad do phobal na Gaeilge i mBaile Átha Cliath. Ag eascairt ó obair an Choiste seo, fuair an Roinn iarratas ó Chonradh na Gaeilge chun staidéar féidearthachta a dhéanamh i leith an tionscadail ag deireadh na bliana seo caite. Cheadaigh mé deontas de €40,897 i mí na Nollag seo caite chun an staidéar féideartheachta seo a dhéanamh. Tar éis próiseas tairisceana a chur ar bun, tá tús curtha le hullmhú an staidéir feidearthachta anois. Nuair a bheidh sé curtha i gcrích, beifear in ann an céad chéim eile i leith an an togra seo a mheas i gcomhréir leis an gCód um Chaiteachas Phoiblí de chuid na Roinne Caiteachais Phoiblí agus Athchóirithe.
