Dáil Éireann Debate, Thursday - 11 November 2021
188. D'fhiafraigh Deputy Mairéad Farrell den Aire Turasóireachta, Cultúir, Ealaíon, Gaeltachta, Spóirt agus Meán cén dul chun cinn atá déanta maidir le toghcháin phoiblí do bhord Údarás na Gaeltachta; agus an ndéanfaidh sí ráiteas ina thaobh. [54837/21]
Amharc ar fhreagraLuaitear sa Chlár Rialtais go ndéanfar athbhreithniú ar struchtúir fheidhmiúcháin agus rialachais Údarás na Gaeltachta, agus ar an bpróiseas roghnúcháin/toghacháin i ndáil le Bord an Údaráis
Faoin socrú reatha maidir le struchtúr Bhord an Údaráis agus faoi réir fhorálacha ábhartha Acht na Gaeltachta 2012, ainmníonn na hÚdaráis Áitiúla a bhfuil ceantar Gaeltachta faoina gcúram acu cúigear comhalta faoi seach chuig an mbord agus roghnaítear an seachtar comhalta eile tríd comórtas poiblí a eagraítear faoi scáth na Seirbhíse um Cheapacháin Phoiblí.
Ar mhaithe le beart a dhéanamh de réir bhriathar an ghealltanais, rinne an Oifig um Sholáthar Rialtais (OGP) comórtas a reáchtáil ar iarratas na Roinne i mí Iúil 2021 i dtreo sainchomhairleoireacht a aimsiú le tabhairt faoin athbhreithniú ar an bpróiseas roghnúcháin/toghcháin i ndáil le Bord Údarás na Gaeltachta. Bhíothas ag súil leis go bhféadfaí tús a chur leis an athbhreithniú sa tríú ráithe den bhliain agus go gcuirfí i gcrích é laistigh de dhá mhí.
Reáchtáladh an comórtas faoin gcreatlach atá i bhfeidhm ag an OGP do sheirbhísí comhairleoireachta gnó agus bainistíochta. Foilsíodh an cuireadh chun tairisceana (RFT) ar 8 Iúil ach níor cuireadh aon tairiscint isteach don chomórtas seo faoin spriocdháta a bhain leis - an 4 Lúnasa.
Is gá, faoi réir na rialacha lena mbaineann, leasú a dhéanamh ar an gcuireadh chun tairisceana le go bhféadfadh an OGP comórtas nua a reáchtáil faoin gcreatlach. Tá an obair sin idir lámha ag an Roinn faoi láthair i dtreo an OGP a bheith in ann comórtas nua a reáchtáil gan mhoill.
