Dáil Éireann Debate, Thursday - 24 February 2022
51. D'fhiafraigh Deputy Éamon Ó Cuív den Aire Turasóireachta, Cultúir, Ealaíon, Gaeltachta, Spóirt agus Meán cén uair a thagann deireadh le tréimhse na gcomhaltaí de Bhord Údarás na Gaeltachta atá ann faoi láthair; an bhfuil sé dóchasach go mbeidh structúir nua boird i bhfeidhm roimh an dáta sin; agus an ndéanfaidh sí ráiteas ina thaobh. [10473/22]
Amharc ar fhreagraMar is eol don Teachta, faoi réir na bhforálacha ábhartha de na hAchtanna um Údarás na Gaeltachta, arna leasú faoi Acht na Gaeltachta 2012, is ar feadh tréimhse cúig bliana a mhaireann ceapacháin ar bhord an Údaráis, cé is móite de na comhaltaí atá ainmnithe ag na húdaráis áitiúla a bhfuil ceantar beag Gaeltachta i gceist, eadhon: Contaetha Chorcaí, Phort Láirge agus na Mí. I gcás na gcontaetha seo is ar feadh tréimhse dhá bhliain a mhaireann an ceapachán agus is ar bhonn an róta a leanas a mhaireann an tréimhse: An Mhí, Corcaigh agus Port Láirge.
Ós rud é gur ceapadh an Bord reatha i mí Eanáir 2018 tiocfaidh deireadh lena shaolré i mí Eanáir 2023. Is é seo an dara bord atá ceaptha faoi na socruithe reatha réamhluaite.
Mar is eol don Teachta, luaitear sa Chlár Rialtais go ndéanfar athbhreithniú ar struchtúir fheidhmiúcháin agus rialachais Údarás na Gaeltachta, agus ar an bpróiseas roghnúcháin/toghacháin i ndáil le Bord an Údaráis.
Mar a bhaineann sé leis an athbhreithniú ar an bpróiseas roghnúcháin/toghcháin i ndáil le bord an Údaráis, cuireadh tús le gairid le comhairliúchán poiblí mar chuid den athbhreithniú.
Tá sé seo á dhéanamh sa chaoi is go mbeidh an deis chuí ag páirtithe leasmhara agus ag an bpobal trí chéile a dtuairimí faoin ábhar a roinnt i scríbhinn leis an Roinn. Is féidir aighneacht a dhéanamh faoin ábhar idir seo agus an 25 Márta tríd an ceistneoir ina leith, a bhfuil fáil air ar gov.ie, a chomhlánú agus a sheoladh chun na Roinne. Ós rud é gur comhairliúchan poiblí é seo, foilseofar na haighneachtaí a fhaigtear ar shuíomh idirlín na Roinne in am tráth.
Comhthreomhar leis an bpróiseas sin, leanfaidh mo Roinn ag obair mar is cuí i gcomhar leis an Oifig um Sholáthar Poiblí, i dtreo sainchomhairleoireacht a aimsiú chun tabhairt faoin athbhreithniú foriomlán agus moltaí ina leith a sholáthar don Roinn maidir leis an ábhar.
Is é an cuspóir trí chéile a chinntiú go mbeidh fáil ag an Údarás ar an saineolas, na scileanna agus an t-ionchur pobail ábhartha agus cuí atá de dhíth le go mbeidh an bord in ann tacú le feidhmeannas an Údaráis a chuid feidhmeanna a chomhlíonadh go héifeachtúil agus go héifeachtach, ar leas na pobail Ghaeltachta a ndéanann an tÚdarás freastal orthu.
Táthar ag súil go mbeidh an t-athbhreithniú críochnaithe i mí Iúil 2022 nó mar sin. Déanfar na moltaí a mheas d’fhonn aon athruithe is gá ar an mBord a chur i bhfeidhm a luaithe is atá indéanta, ag cur san áireamh aon athruithe reachtaíochta nó eile a d’fhéadfadh a bheith ag teastáil.
