An Oifig Buiséid Pharlaiminteach (OBP)

Cuireann Oifig Buiséid Pharlaiminteach Thithe an Oireachtais faisnéis, anailís agus comhairle neamhspleách agus neamhchlaonta ar fáil do Thithe an Oireachtais.

Ceannasaíocht agus struchtúr eagraíochtúil

Titeann an Oifig Buiséid Pharlaiminteach (OBP) faoi cheannas an stiúrthóra, Annette Connolly agus is uirthi atá an fhreagracht fhoriomlán i dtaca lena forbairt agus a bainistiú.

Mar chuid dá struchtúr eagraíochtúil, tá an t-aonad um anailís eacnamaíoch agus fioscach agus aonad na gcostálacha agus an tsamhaltaithe, agus an bheirt acu á stiúradh ag leibhéal príomhoifigigh.

Taispeáin níos mó

An tAonad um Anailís Eacnamaíoch agus Fioscach

Is í an leas-stiúrthóir, Denise O’Connell, a dhéanann maoirsiú ar an aonad um anailís eacnamaíoch agus fioscach, arb é atá freagrach as taighde agus anailís bhuiséid, rud a chuimsíonn iniúchadh ar chúrsaí caiteachais agus cánach, taighde eacnamaíoch, bainistiú airgeadais phoiblí agus rialacha seimeastair agus fioscacha an AE.

Aonad na gCostálacha agus an tSamhaltaithe

Tá an Dr. Jacopo Bedogni i mbun aonad na gcostálacha agus an tsamhaltaithe, aonad atá dírithe ar anailísí cuimsitheacha costála beartais agus taighde buiséid mionsonraithe a dhéanamh do Chomhaltaí agus do pháirtithe. Ar a bharr sin, tá ról lárnach ag an aonad seo i dtaca le cumais samhaltaithe a fheabhsú le haghaidh anailís eacnamaíoch agus fioscach.

Cúlra Croí-Phearsanra

Annette Connolly (stiúrthóir): Sular ghlac sí ról an stiúrthóra san OBP, bhí Annette ina ceannasaí ar an Aonad Beartais um Bainistiú Caiteachais Lárnaigh sa Roinn Caiteachais Phoiblí agus Athchóirithe. Is Oifigeach Poiblí Ainmnithe í Annette faoin Acht um Brústocaireacht a Rialáil, 2015; féach an Clár Brústocaireachta.
Denise O’Connell (leas-stiúrthóir, an t-aonad um anailís eacnamaíoch agus fioscach): D’oibrigh Denise O’Connell sa Roinn Airgeadais roimhe seo agus róil éagsúla aici lena n-áirítear beartas cánach, cúrsaí eacnamaíochta agus buiséadacha. D’oibrigh Denise sa Roinn Sláinte freisin.
Jacopo Bedogni (ceann aonad na gcostálacha agus an tsamhaltaithe): Sular ghlac sé lena ról reatha, bhí an Dr Jacopo Bedogni ag obair mar chúntóir taighde in Ollscoil Genoa na hIodáile. D’oibrigh sé freisin sa Roinn Caiteachais Phoiblí agus Athchóirithe mar eacnamaí agus ghlac freagracht, ina dhiaidh sin, as stiúradh an taighde buiséid laistigh den OBP.

Folaigh

Cén fáth ar bunaíodh an Oifig Buiséid Pharlaiminteach?

D’aithin an Eagraíocht um Chomhar agus Fhorbairt Eacnamaíochta an gá a bhí leis an oifig ina hathbhreithniú ar fhormhaoirsiú buiséid Pharlaimint na hÉireann. Mhol an Fochoiste um Athleasú na Dála de chuid an Oireachtais, ina thuarascáil deiridh i mí na Bealtaine 2016, go mbunófaí an oifig.

Cuireann OBP, a bunaíodh in 2017, tacaíocht, comhairle agus anailís shaincheaptha ar chúrsaí eacnamaíocha agus fioscacha ar fáil do Thithe an Oireachtais, dá gcomhaltaí agus dá gcoistí agus a ról in airgeadas Stát na hÉireann a cheadú agus i bhformhaoirseacht a dhéanamh air á chomhlíonadh acu. Tacaíonn sé go háirithe leis an gCoiste um Fhormhaoirsiú Buiséid de réir mar a dhéanann sé grinnscrúdú ex ante ar gach ábhar buiséadaithe. Cuireadh an OBP ar bhonn reachtúil san Acht um Choimisiún Thithe an Oireachtais (Leasú), 2018 agus tá grúpa comhairleach seachtrach aige le comhairle a thabhairt ar chúrsaí teicniúla.

An Chomhairle Fhioscach agus an OBP

Tá an Oifig Buiséid Pharlaiminteach (OBP) ar cheann den dá institiúid neamhspleácha fhioscacha in Éirinn, agus is é Comhairle Fhioscach Chomhairleach na hÉireann an ceann eile. I gcomparáid leis an OBP, díríonn an Chomhairle Fhioscach ar mheasúnuithe áirithe a bhfuil reachtaíocht leagtha síos ina leith agus ar na measúnuithe siúd a chur ar fáil go poiblí: tacú le réamh-mheastacháin mhaicreacnamaíocha an Rialtais, measúnú a dhéanamh ar a réamhaisnéisí, monatóireacht a dhéanamh ar chomhlíonadh rialacha fioscacha, agus measúnú a dhéanamh ar sheasamh fioscach foriomlán an Rialtais.

Letter of Understanding regarding the relationship between the Houses of the Oireachtas’s Parliamentary Budget Office and the Irish Fiscal Advisory Council

Grúpa comhairleach seachtrach

Grúpa de shaineolaithe acadúla agus ón earnáil phríobháideach is ea grúpa comhairleach seachtrach OBP a chabhraíonn le OBP le cúnamh teicniúil agus modheolaíochta pro-bono. D’aontaigh Coimisiún Thithe an Oireachtais bunú an ghrúpa chomhairligh sheachtraigh in Aibreán 2018 agus tagann sé le Moladh na Comhairle OECD ar Phrionsabail d’Institiúidí Neamhspleácha Fioscacha (2014) ina moltar go bhforbraíonn institiúidí neamhspleácha fioscacha sáraí do mheasúnú seachtrach ar a gcuid oibre. Reáchtáladh an chéad chruinniú den ghrúpa comhairleach seachtrach Dé Luain, 25 Meitheamh 2018.

Is é comhaltas iomlán an ghrúpa chomhairligh sheachtraigh:

An Cathaoirleach Robert Chote (Údarás Staidrimh na Ríochta Aontaithe (UKSA) agus Comhairle Fhioscach Thuaisceart Éireann (NIFC))
An Dr Alan Barrett (ESRI)
An Dr Micheál Collins (An Coláiste Ollscoile, BÁC)
Dervla McCormack (Comhpháirtí PwC (Poblacht na hÉireann))
An Dr Stephen Kinsella* (Ollscoil Luimnigh)

* Tháinig an Dr Stephen Kinsella in ionad an Dr Alan Ahearne (OÉ Gaillimh) a bhí ina comhalta den ghrúpa comhairleach seachtrach ó Mheitheamh 2018 go Lúnasa 2020.

Tagann an grúpa comhairleach seachtrach le chéile uair sa bhliain ar a laghad. Bhí an cruinniú ba dhéanaí den ghrúpa comhairleach seachtrach ar siúl an 8 Márta 2024.

Sonraí teagmhála

An Oifig Buiséid Pharlaiminteach
Teach Laighean
Sráid Chill Dara
Baile Átha Cliath 2
D02 XR20
pbo@oireachtas.ie

Maidir leis an OBP