Foilsíonn Comhchoiste na Gaeilge a thuarascáil bhliantúil 2020-2021 agus a thuarascáil ar a thoscaireacht chuig Ard-Fheis Chonradh na Gaeilge 2022

Sa chéad tuarascáil, ‘Tuarascáil Bhliantúil 2020 / 2021 (7 Deireadh Fómhair 2020-31 Nollaig 2021)’, leagann an Comhchoiste sonraí a chuid imeachtaí agus cúraimí le linn an tréimhse seo os comhair na dTithe agus os comhair an phobail.

Dúirt Cathaoirleach an Choiste, an Teachta Dála Aengus Ó Snodaigh: “Cé go bhfuil Comhaltaí an Chomhchoiste sásta i láthair na huaire le himeachtaí reatha agus cúraimí an Chomhchoiste, nílimid sásta leis na seirbhísí atá ar fáil dúinn ó Sheirbhís Thithe an Oireachtais. Cé go bhfeidhmíonn an Comhchoiste go huile is go hiomlán trí mheán na Gaeilge, níl na seirbhísí seo a leanas ar fáil dúinn as Gaeilge:

1. Seirbhísí Leabharlainne agus Taighde;
2. Seirbhísí Comhairle Dlí;
3. Seirbhísí Craoltóireachta;
4. Seirbhísí Caidrimh Phoiblí.

“Táimid den tuairim go bhfuil sé de cheart againn na seirbhísí sin a fháil inár dteanga oibre féin, agus sinn i mbun obair an Chomhchoiste; agus gur chóir go mbeadh na seirbhísí sin ar comhchéim leis na seirbhísí atá ar fáil do na Coistí eile go léir a fheidhmíonn trí mheán an Bhéarla. Ní hamhlaidh atá an scéal agus, mar sin, feidhmíonn an Comhchoiste faoi mhíbhuntáiste mór, i gcomparáid leis na Coistí eile, agus iad siúd i mbun a gcuid oibre.”

Sa tuarascáil eile, tugann an Comhchoiste léargas ar a thoscaireacht chuig Ard-Fheis Chonradh na Gaeilge ag deireadh mhí Feabhra 2022.

Dúirt  an Teachta Ó Snodaigh: “Thar ceann an Chomhchoiste, molaim obair spreagúil Chonradh na Gaeilge agus na moltaí ar glacadh leo le linn an phlé a rinneadh ag an Ard-Fheis.”

Tá 14 Chomhalta, naonúr ó Dháil Éireann agus cúigear ó Sheanad Éireann, mar Chomhaltaí den Chomhchoiste: Comhchoiste na Gaeilge, na Gaeltachta agus Phobal Labhartha na Gaeilge.