Comhchoiste na Gaeilge, ag ceistiú cén fáth a bhfuil logainmneacha Béarla i gcomhair áiteanna Gaeltachta fós ar fáil ar an Éircóid

Tosóidh an cruinniú ar 13.30 i Seomra Coiste 4, TL 2000, Teach Laighean.

Dúirt Cathaoirleach an Chomhchoiste, an Teachta Dála Aengus Ó Snodaigh: “Tá an fhoráil dhlíthiúil seo soiléir agus gan débhrí, ach seachas sin tá an chuma ar an scéal go bhfuil neamhaird á tabhairt uirthi. Maidir le reachtaíocht a bhaineann le cearta phobal na Gaeilge, tarlaíonn sé arís is arís eile go dtugtar neamhaird uirthi, agus go bhfuil  roinnt comhlachtaí poiblí áirithe den tuairim gur féidir leo neamhaird a thabhairt  uirthi. Níl an cur chuige seo inghlactha, agus níl mo Chomhchoiste sásta glacadh leis, is cuma cén chúis nó leithscéal a thugtar ina leith.

“Nuair atá foráil dhlíthiúil i bhfeidhm, tá dualgas ar gach uile shaoránach agus ar gach uile chomhlacht poiblí cloí léi, agus na socruithe atá de dhíth chun cloí léi a chur i bhfeidhm. Má tá costas breise i gceist i leith comhlachtaí poiblí, sin é mar atá sé, agus ní leithscéal inghlachta é a rá ‘ní féidir linn sin a dhéanamh mar go bhfuil costas breise nó cúraimí breise i gceist, nó go mbeidh orainn córas nua a chur i bhfeidhm, nó go mbeidh orainn daoine breise a earcú’.”

Tá 14 Chomhalta, naonúr ó Dháil Éireann agus cúigear ó Sheanad Éireann, mar Chomhaltaí den Chomhchoiste na Gaeilge, na Gaeltachta agus Phobal Labhartha na Gaeilge. Is féidir an cruinniú, i Seomra Coiste 4 a fheiceáil beo ar Teilifís an Oireachtais.

Chomh maith leis sin, is féidir imeachtaí an Chomhchoiste a fheiceáil ar aip fhónchliste Thithe an Oireachtais, a bhfuil ar fáil ó ghléasanna Apple agus Android.