Dáil Éireann Debate, Wednesday - 17 April 2024
64. D'fhiafraigh Deputy Catherine Connolly den Aire Turasóireachta, Cultúir, Ealaíon, Gaeltachta, Spóirt agus Meán maidir le Ceist Pharlaiminte Uimh. 17 den 15 Feabhra 2024, cén dul chun cinn atá déanta ar an obair athbhreithnithe ar na chéad deich bplean teanga a ceadaíodh faoi Acht na Gaeltachta, 2012; cathain a chríochnófar an tuarascáil; cathain a fhoilseofar an tuarascáil; agus an ndéanfaidh sí ráiteas ina thaobh. [16895/24]
View answerAr 28 Meitheamh 2023, d'fhógair mé go raibh conradh bronnta ar an gcomhlacht, Barr Feabhais Teo., chun athbhreithniú a dhéanamh ar an gcéad 10 bplean teanga a ceadaíodh faoi réir Acht na Gaeltachta 2012.
Cinnteoidh an tionscnamh seo, a bhfuil buiséad suas le €92,500 á chur ar fáil ina leith, go ndéanfar athbhreithniú neamhspleách ar fheidhmiú na bpleananna teanga seo. Cuirfear aiseolas maidir le feidhmiú na bpleananna ar fáil agus, bunaithe ar an méid a aithnítear san athbhreithniú, beifear in ann céimeanna a ghlacadh d'fhonn cur i bhfeidhm an phróisis phleanála teanga a fheabhsú.
Is iad seo a leanas an 10 Limistéir Pleanála Teanga atá i gceist:
• Cloich Chionnaola, Gort an Choirce, An Fál Carrach & Machaire Rabhartaigh;
• Ná Déise;
• Ciarraí Theas;
• Gaoth Dobhair, Rann na Feirste, Anagaire & Loch an Iúir;
• Ciarraí Thiar;
• Conamara Láir;
• An Cheathrú Rua;
• Maigh Eo Thuaidh;
• Ráth Chairn & Baile Ghib; agus,
• Árainn Mhór.
Tá curtha in iúl ag Barr Feabhais Teo. go bhfuil teagmháil ghníomhach déanta ag an gcomhlacht le páirtithe leasmhara éagsúla i leith an athbhreithnithe ó cuireadh tús leis. Tuigtear dom go bhfuil an comhairliúchán uile déanta de réir mar a bhaineann sé leis an athbhreithniú agus go bhfuil tús curtha le dréachtú na tuarascála.
Táthar ag súil go mbeidh an tuarascáil chríochniúil curtha faoi bhráid mo Roinne go rí-ghairid.
Is léir go bhfuil dul chun cinn á dhéanamh ag Barr Feabhas san obair atá ar bun acu. Tá deimhnithe arís ag Barr Feabhas le hoifigigh mo Roinne go leanfaidh siad ar aghaidh go dícheallach lena gcuid oibre chun a chinntiú go gcuirfí tuarascáil chuimsitheach ar fáil faoi réir na dtéarmaí tagartha.
Nuair a bheidh deis ag mo Roinn leagan críochnúil den tuarascáil a bhreithniú, beifear in ann breathnú chun cinn ar an gcéad bhaisc eile de phleananna a mbeidh athbhreithniú le déanamh orthu.
