Comhchoiste na Gaeilge ag dul i mbun plé le hIntéirnigh TG4

Beidh an cruinniú ar siúl i Seomra Coiste 1 ag 13:30, nuair a thiocfaidh ionadaithe thar ceann TG4 os comhair an Chomhchoiste.

Dúirt Cathaoirleach an Chomhchoiste, an Teachta Dála Aengus Ó Snodaigh: “Is léir don Chomhchoiste a thábhachtaí atá an fhís fhadradharcach agus fhadtréimhseach a bhí ag TG4 i gcás na meán craolta i nGaeilge nuair a tháinig an craoltóir ar an bhfód breis is 25 bliain ó shin. Sna sála air sin, táim féin agus Comhaltaí an Chomhchoiste ag súil go mór le tuairimí, taithí agus moltaí a chloisteáil ón gcéad ghlúin eile dóibh siúd atá i mbun taithí oibre le TG4.”

“Tá súil ag Comhaltaí an Chomhchoiste dul i mbun cainte leis na daoine céanna a bheidh i mbun oibre ag cur an Ghaeilge chun cinn ar na meáin chraolta ar fud na tíre agus na cruinne, agus cúnamh an Chomhchoiste a thabhairt dóibh tabhairt faoi sin ar aon bhealach ar féidir leis é sin a dhéanamh”.

Tá 14 Chomhalta, naonúr ó Dháil Éireann agus cúigear ó Sheanad Éireann, mar Chomhaltaí de chuid Chomhchoiste na Gaeilge, na Gaeltachta agus Phobal Labhartha na Gaeilge.

Is féidir féachaint ar an gcruinniú seo beo ó Seomra Coiste 1 beo ar Teilifís an Oireachtais.

Chomh maith leis sin, is féidir imeachtaí an Chomhchoiste a fheiceáil ar aip fhónchliste Thithe an Oireachtais, a bhfuil ar fáil ó ghléasanna Apple agus Android.