Tairgim:—
Go ndeonfar suim nach mó ná £360 chun slánuithe na suime is gá chun íoctha an Mhuirir a thiocfas chun bheith iníoctha i rith na bliana dar críoch an 31ú lá de Mhárta, 1948, chun Tuarastal agus Costas i dtaobh Seirbhísí na Gaeltachta, ar a n-áirítear Deontais um Thogail Tithe agus Bréidíní Baile a cheannach agus a dhíol.
Tá ag teastáil faoin meastachán seo sé mhíle déag, trí chéad agus seasca punt. Is lú de dhachad-a-seacht míle, seacht gcéad agus fiche-cúig punt an méid sin i gcompráid leis an méid a soláthraíodh anuraidh; ach sé faoi ndear sin ná gur mó de sheachtó-naoi míle, naoi gcéad agus triocha-sé punt na Leithreasa-i-gCabhair a meastar a baileofar agus ná fuil curtha leis an gcaiteachas ach triocha-dó míle, dhá chéad agus aon phunt déag. Dá n-áirítí a n-íoctar as Leithreasa-i-gCabhair, chífí go bhfuiltear ag brath ar chaiteachas de cheithre chéad agus óchtó-sé míle, ocht gcéad agus caogadó punt ar fad agus go bhfuiltear ag súil le fáltais airgid de cheithre chéad agus seachtó míle, cheithre chéad agus nócha-dó punt.
Tá méadú de naoi gcéad agus triocha-naoi punt ar chostas an Cheann-Ionaid agus sé is mó faoi ndear é sin ná gnáth-bhreisithe tuarastail agus costas na n-athruithe ar thuarastail a ceadaíodh le déanaí lúide sábháltas maidir le méid na foirne dá soláthraítear. Tá sa soláthar seo tuairim is míle, dhá chéad agus caoga punt a bhaineann le foirinn atá ar iasacht ag Ranna eile Rialtais.
Tá dhá mhíle, seacht gcéad agus fiche-naoi punt de mhéadú sa tsoláthar faoi mhírcheann D.1. do thuarastail na foirne atá i mbun na dTionscal Tuaithe. Sé faoi ndear an méadú ná an fhoireann bhreise dá soláthraítear agus costas na n-athruithe ar thuarastail a ceadaíodh le déanaí. Tá méaduithe beaga ar na mírchinn D.2. agus D.3. freisin toisc na n-athruithe céanna.
Tá laghdú de sé chéad agus caoga punt sa tsoláthar faoi mhírcheann D.4. do chostais taistil foireann da dTionscal Tuaithe. Ní ceapter go mbeidh gá leis an méid céanna taistil i mbliana.
Tá méadú de naoi míle, seacht gcéad agus caoga punt sa tsoláthar faoi mhírcheann D.5. do Mhaisíní agus Planda. Tá áirithe sa tsoláthar breis is cheithre mhíle déag punt i leith gléasra don mhuileann shníomhacháin i gCill Chártha agus baineann an chuid is mó den tsoláthar tharais sin le maisíní don tionscal cniotála. Fuarthas cuid den ghléasra shníomhacháin roimh dheireadh na bliana roimhe seo ach níor húsáideadh an soláthar a bhí sa Vóta dhó, toisc nár thuit sé le n-íoc do réir coinníollacha na gconartha.
Tá céad agus caoga-seacht míle, sé chéad agus seasca punt á soláthar le haghaidh abhar déantóireachta faoi na mírchinn D.6., D.8., D.9., D.10., agus D.11. i gcompráid leis an gcéad agus ochtó-ceathair míle, cheithre chéad agus seachtó-seacht punt a soláthraíodh don bhliain anuraidh. Tá an soláthar don bhliain seo bunaithe ar an dtrádáil a ceaptar a déanfar le linn na bliana sna tionscail fiteacháin agus bréagán.
Maidir le caiteachas eile faoi na mírchinn sin, tá méadú de chúig míle agus caoga-seacht punt ar an soláthar a deintear agus baineann an chuid is mó de leis an soláthar bhreise atá á dhéanamh i dtaobh bréidín baile a cheannach.
Tá méadú de dhá mhíle déag, ocht gcéad agus nócha-cúig punt ar an soláthar faoi mhírcheann D.12. le haghaidh an tionscail deilbhíní luaidhe atáimíd tar éis a bhunú i gConamara. Níl an tionscal san faoi lán-tseol go fóill agus táimíd ag súil le cúnamh an lucht oibre chun an tionscal a chur ar a bhonnaibh i gceart.
Tá méaduithe beaga ar an soláthar faoi na mírchinn E.1. agus E.2. le haghaidh tuarastail agus costais taistil na foirne atá i gcúram na dtionscal mara.
Táimíd ag soláthar fiche-haon míle, náoi gcéad agus seachtó-cúig punt níos mó faoi mhírcheann E.3. le haghaidh an tionscail cheilp agus feamna. Tá soláthar ann chun ceilp a cheannach aris le haghaidh potáise ach, ag féachaint don deacracht a bhain le margadh a fháil an bhliain seo ghaibh tharainn, is féidir ná cuirfear chun mórán ceilpe a cheannach i mbliana. Beifear ag ceannach i bhfad níos mó slata mara agus feamain, ámh, agus déanfaidh sé sin cúiteamh sa scéal. Tá laghdú ar a soláthraítear do chostas iompair toisc ná tuitfidh cuid áirithe de ar an Roinn i mbliana. Tá méadú mór ar an soláthar do chostais láimhseála na feamna, toisc ná raibh sa tsoláthar anuraidh ach comhartha. Tá deireadh curtha anois leis an Ordú Cumhachta Práinne a bhí i bhfeidhm i dtaobh na Ceilpe ón mbliain 1943 anuas.
Níl ach sé chéad agus fiche punt á holáthar faoi mhírcheann E.4. le haghaidh an tionscail chairrgín bídh. Ní bhainneann sin ach leis an gcairrgín a chuireann an Roinn ar an margadh i bpaicéidí mar abhar bídh. Fágtar faoi ghnólachta príobháideacha an gnáth-chairrgín tráchtála a cheannach ó na bainteóirí agus a dhíol ar an margadh anseo agus tar lear.
Tá méadú de cheithre mhíle, cheithre chéad agus ocht bpunt ar an soláthar faoi mhírcheann F.1. do thuarastal foireann an Taisc-Ionaid. Sé faoi ndear é sin ná méadú ar líon na foirne maraon le costas na n-athruithe ar thuarastail. Tá méadú de thrí chéad agus caoga punt ar a soláthraítear do thaispeántais faoi mhírcheann F.2. ach tá laghdú de seacht gcéad agus caogacúig punt ar na hiol-chostais faoi mhircheann F.3.
Níl aon difríocht sa tsoláthar faoi mhírcheann G. le haghaidh Seirbhísí Ilghnéithe. Is soláthair chomhartha atá sna mion-ranna go léir taobh amuigh de mhion-roinn (5) a bhaineann lena n-íoctar amach faoi dhéin costas áirithe i dtaobh na Seirbhíse Iompair idir Oileán Cléire agus Dún na Séad i gCo. Chorcaighe.
Tá méadú de chéad agus seachtó punt sa tsoláthar faoi mhírcheann H.1. do thuarastail na foirne tuaithe atá i mbun obair na dtithe sa Ghaeltacht, toisc na n-athruithe ar thuarastail. Tá méadú de thrí chéad agus fiche punt ar a soláthraítear faoi mhírcheann H.2. do chostais taistil agus eile na foirne sin.
Táimíd ag soláthar dhá mhíle punt níos mó i mírcheann H.3. le haghaidh deontas faoi Achta na dTithe (Gaeltacht). Tá méadú ag teacht, diaidh ar ndiaidh, ar na cásanna a ceadaítear.
Tá meadú de thuairim is ochtó míle punt sna Leithreasa - i - gCabhair a meastar a gheobhfar. Baineann an méadú sin nach mór ar fad leis na tionscail tuaithe agus leis na tionscail mara. Meastar go mbaileofar isteach agus amach le cheithre chéad agus cheithre mhíle déag punt as na tionscail tuaithe—méid atá nóchaceathair míle punt níos mó ná a measadh a baileofaí anuraidh. Táimíd ag ceapadh go mbeidh méadú ar na díolacháin faoi gach gné de na sean-tionscail agus tá san áireamh na díolacháin as an dtionscal deilbhíní luaidhe a bunaíodh le déanaí. Meastar go n-íocfar amach tuairim is céad mile punt mar pháigh oibre agus is méadú é sin de bhreis is triocha-cúig míle punt ar a measadh anuraidh.
Tá soláthar ann do thuairim is fichetrí míle punt breise a bhailiú as ceilp agus feamain a dhíol. Bheadh méadú ar a mbaileófaí fiú amháin dá bhfágtaí an cheilp ar lár.
Chífear ón dtuairisc seo go léir go bhfuiltear ag cur go mór leis an obair atá á cur ar fáil do mhuintir na Gaeltachta. Tá laghdú mór ar an méid glan a hiarrtar faoin meastachán ach sé faoi ndear é ná an meastachán forlíontach a ceadaíodh don bhliain seo ghaibh tharainn agus a bhain go mór le soláthairtí a cheannach do na tionscail tuaithe. Taispeánann an meastachán go bhfuiltear ag súil le méadú ina ndíolfar d'earraí na dtionscal tuaithe agus an tionscail feamna; go bhfuil méadú ag teacht ar an obair faoi Achta na dTithe; agus go mbeidh méadú mór ar a bhfaighidh muintir na Gaeltachta mar pháigh nó cúiteamh oibre de bharr a bhfuil á dhéanamh ag an bhFo-Roinn.