Maidir leis an tairiscint seo chun Aire breise a chur isteach san Rialtas, táimid ina choinne mar ceapaimíd go bhfuil ár ndóthain againn cheana. Ba cheart go mbeadh an Taoiseach i ndon ath-chóiriú a dhéanamh ar na hAirí atá aige sa gcaoi go mbeadh an Rialtas i ndon gnó na hAireachta nua a dhéanamh tré cheann de na hAirí sin. Ceart go leor, tá an rogha na nAirí go dona os rud é go bhfuil easba Gaeilge ar an Rialtas.
Cuirim-se i gcoinne na tairiscinte seo freisin toisc go gcuireann sí le costas an Rialtais mar is tairiscint í nach bhfuil riachtanach. Maidir leis an bhfear atá ceapaithe, tá fadhbh eile le réiteach ansin. Is duine mise a raibh dlúth-bhaint aige leis an nGaeilge, a bhfuil dlúth-bhaint fós agam léi agus ag a mbeidh go rachaidh mé i gcré. Tá aithne agam ar na daoine a bhfuil dlúth-bhaint acu le hobair na Gaeltachta, ní hé amháin in mo cheantar féin ach ar fud na tíre. Tá aithne agam ar na daoine ar fud na tíre atá ag obair go dícheallach, dúthrachtach in athbheocaint na teangan. Ach níor chuala mé riamh go raibh dlúth-bhaint ag an bhfear atá ainmnithe anseo inniu leis an nGaeilge.
Sé an príomh rud atá riachtanach don duine a ceapfar mar Aire ar an Roinn seo go mbeadh cruinn-eolas aige ar an nGaeltacht agus ar mhuintir na Gaeltachta. Táim in amhras go bhfuil na tréithe riachtanacha ag an bhfear atá in aigne an Taoisigh a cheapadh don phost seo. Tá caint i dtaobh na hAireachta seo a chur ar bun le blianta beaga anuas. Nuair a tháinig tairiscint an Rialtais os cóir na Dála chun an Aireacht seo a bhunú, cé go rabhamar in amhras faoin scéal, d'aontaíomar leis ar mhaithe leis an nGaeltacht agus leis an tír. Ach fé mar adúirt an Teachta Mac Pharthaláin, do thóg sé an-fhada ar an Rialtas a aigne a dhíriú ar an gceist, agus tá tuairim láidir agam nach bhfuil tuairim dá laghad acu i dtaobh plean, scéim nó eagraíocht chun an obair a bheadh le déanamh a dhéanamh i gceart.
Is í an Aireacht seo ceann de na hAireachtaí is tábhachtaí sa Rialtas, dar liomsa, mar gheall ar chomh dian is a bheas an obair agus a thábhachtaí atá sé aon obair fhónta a dhéanamh nó aon scéim fhónta a chur ag obair maidir le leas na Gaeltachta.
Ar an gcead dul síos, tá ceist na Gaeilge féin tábhachtach. Mura bhfuil beartaithe ag an Rialtas go mbeidh an Roinn seo Gaelach ó bhun go barr; muna bhfuil beartaithe ag an Rialtas gnó na Roinne a dhéanamh ar fad i nGaeilge, agus muna bhfuil beartaithe acu an Ghaeilge d'úsáid leis an bpobal ar an taobh amuigh, beidh thiar air agus ar an Aireacht.
Tugaidís an deá-shampla maidir le húsáid na Gaeilge agus caithfidh an Aireacht an deá-shampla sin a thabhairt. Ón gcruthú atá againn mar gheall ar an bhfear atá ainmnithe don phost, níl mé sásta go bhfuil sé, mar dhuine, ábalta ar an obair a dhéanamh mar ba cheart í a dhéanamh. Sin é mo thuairim agus tuairim a lán daoine eile.
Dob fhéidir leis an Taoiseach an Aireacht seo a chur faoi chúram duine eile a bhfuil níos mó eolais agus taithi aige ar an nGaeltacht agus an Ghaeilge. Cad'na thaobh ná tabharfaí é don Teachta Ua Maolchatha, an tAire Oideachais? Admhaím go mbeadh sé deacair fear oiriúnach eile d'fháil chun é chur sa Roinn Oideachais ina ionad. Admhaím, leis, gurab é cúram an Taoisigh, maidir le ceist den tsaghas seo, duine a ainimniú mar Aire do réir an Bhunreachta agus níl sé ach ag cur leis an dualgas sin.
Ach tá scéal eile ann. An bhfuil an duine atá ceaptha oiriúnach don phost? Dála an scéil, níor ghá Aire nua sa mbreis a cheapadh in aon chor ag féachaint don méid cainte a chualamar ó bhaill an Rialtais mar gheall ar a thábhachtaí is atá sé airgead a shábháil. Féachann sé aisteach ar fad go dtiocfadh an Taoiseach isteach sa Dáil ag iarraidh cur leis an gcostas atá cheana ar an tír mar gheall ar an Rialtas do choimeád ar siúl. Admhaím nach bhfuil ann ach mion-rud i gcomórtas leis na milliúin púnt eile a caitear. San am chéanna, áfach, do bheadh an deá-shampla dhá thabhairt dá gceapfadh an Taoiseach gléas eile agus an post atá le líonadh a líonadh le duine de na hAiri atá ann cheana féin. Ba chuma liom-sa cé ceapfaí, cé acu dlíodóir, múinteoir, feírmeoir, nó gabha a bheadh ann dá mbeinn cinnte go mbeadh na tréithe oiriúnacha aige atá riachtanach le haghaidh an phoist.
Táimid go léir sa Teach seo ar aon-aigne nó in ainm a bheith ar aon aigne, mar gheall ar chomh tábhachtach is atá sé an Ghaeilge d'aithbheochaint. Níl mise sásta leis na tuairimí mar gheall ar an nGaeilge atá nochtaithe ag an duine a hainmníodh. Níl mé sásta go bhfuil sé dáiríre agus dúthrachtach maidir le haithbheochaint na Gaeilge. Dá bhrí sin, ní dóigh liom—is oth liom go bhfuil sé orm é seo a rá, ach is fearr tuairim a nochtadh do réir má tá sé in aigne dhuine—go bhfuil an fear a hainmníodh oiriúnach. Támuid ag cur i gcoinne na tairiscinte seo atá curtha os cóir na Dála inniu ag an Taoiseach.