Is mise príomhfheidhmeannach Údarás na Gaeltachta ó mhí Aibreán 2005. Tá muid an-sásta go bhfuil an deis seo againn cur i láthair a chur os comhair an choiste.
Faoi mar is eol do bhaill an Choiste um Chuntais Phoiblí, tá sé mar phríomhchuspóir ag Údarás na Gaeltachta caomhnú agus leathadh na Gaeilge mar phríomh-mheán cumarsáide sa Ghaeltacht a spreagadh. Úsáideann an t-údarás réimse leathan tionscnamh agus ionstraim eacnamaíochta, sóisialta agus cultúrtha chun an cuspóir sin a bhaint amach. Tá an Ghaeilge faoi bhrú an-mhór faoi láthair sa Ghaeltacht mar theanga teaghlaigh agus pobail ach tá réimse tionscnamh nua á seoladh againn chun aghaidh a thabhairt ar an bhfadhb sin ar bhealach fuinniúil fócasáilte.
Táim ag díriú san aighneacht seo ar na príomhphointí a léiríonn staid eacnamaíochta, sóisialta agus cultúrtha na Gaeltachta mar atá sonraithe i dtuarascáil agus cuntais an údaráis do 2004.
Tharla athruithe suntasacha le blianta beaga anuas sa chomhthéacs forbartha, infheistíochta agus buiséadachta ina bhfuil an t-údarás ag feidhmiú: tá laghdú ar an réimse déantúsaíochta, tá athruithe móra ag tarlú sa domhan timpeall orainn. Tá cuid mhór de na réimsí ard-scileanna atá mar bhunús fostaíochta sa chuid eile den tír deacair a mhealladh ach go bhfuil ag éirí linn de réir a chéile sárú a fháil thar na constaicí a bhaineann leis sin.
Tá an Ghaeilge ag staid an-leochaileach mar theanga phobail agus teaghlaigh sa Ghaeltacht. I measc na dtionscnamh a mheastar a chabhróidh le buan níos folláine agus níos láidre a chur faoi chúrsaí Ghaeilge sa Ghaeltacht tá bunú Oifig an Choimisinéara Teanga sa Spidéal i gConamara agus tús feidhmithe Acht na dTeangacha Oifigiúla; sraith tionscnamh nua ag an Roinn Gnóthaí Pobail, Tuaithe agus Gaeltachta; tionscnaimh phleanála teanga sa Ghaeltacht i measc an phobail go háirithe; tá tionscnaimh nua eile beartaithe ag an údarás féin a bheidh ag teacht chun cinn de réir a chéile.
Mar is léir ón tuarascáil bhliantúil, tá réimse an-leathan gníomhaíochtaí idir lámha ag Údarás na Gaeltachta. Táéagosúlacht an-mhór idir sinn féin agus gníomhaíochta eile forbartha Stáit a chlúdaíonn gach aon aicme den phobal ó na naíonraí go dtí fostaíochta do dhaoine i dtionscail de chuid an údaráis. Léiríonn an taifead siar tríd na blianta gur éirigh go maith tríd is tríd leis an údarás ainneoin easnamh áirithe infrastructúir atá feabhsaithe go mór le blianta beaga anuas ach atá fós ann chomh fada agus a bhaineann le cúrsaí teileachumarsáide ach go háirithe, ach go bhfuil dul chun cinn ar leith á dhéanamh ann, ach ag an am céanna, d'éirigh linn tríd is tríd na constaicí sin a shárú agus fostaíocht nua a chur ar fáil. An rud is tábhachtaí ná an sprioc a bhí leagtha síos dúinn faoin phlean forbartha náisiúnta a shárú gach aon bhliain. Bhí 800 in aghaidh na bliana an sprioc a bhí leagtha amach dúinn agus tá breis agus 90% den sprioc sin bainte amach faoi dheireadh na bliana lena bhaineann an tuarascáil.
Tá dúshlán ar leith dúinne agus do na Ranna eile féachaint go gcuirfear tionscnaimh ar fáil a chuideoidh le buanú na bpobal ar na hoileáin. Tá nithe áirithe a thabharfaidh aghaidh air sin.
Chuir an coiste seo suim ar leith i gcostas in aghaidh an phoist ag cruinnithe roimhe seo. Ar an meán, ag féachaint siar sé bhliana, tá costas in aghaidh an phoist coinnithe ag leibhéal an-réasúnach ó thaobh luach ár gcuid airgid a fháil. Tagann ceisteanna aníos faoi chomparáid idir sinn féin agus cruthú fostaíochta in áiteanna eile sa tír. Is deacair comparáidí bailí a dhéanamh le gníomhaireachtaí eile forbartha náisiúnta mar bíonn a gcuid staitisticí sin bunaithe ar phoist a chruthú den chuid is mó i gcathracha, Baile Átha Cliath san áireamh, agus i gceantair ina bhfuil na réimsí go léir seirbhísí tacaíochta ar fáil. De réir nádúir na gceantar tuaithe agus Gaeltachta, tá costais breise a fhágann an costas beagán níos airde.
Tá trí ghné shuntasacha ag baint leis an gclár forbartha eacnamaíochta reatha. Tá leagan amach nua againn do na cúig bliana atá romhainn agus tá athrú treo á chur i bhfeidhm againn. Tá níos mó de na hacmhainníá gcur i dtreo na gceantar tearcfhorbartha nach bhfuair sciar iomlán cothrom den infheistíocht go dtí seo agus tá sé taobh istigh dár smacht féin sin a cheartú. Tá straitéis fhadtéarmach leagtha amach againn i gConamara agus i nGaoth Dobhair, na háiteanna ina bhfuil an dá phobal is mó maidir lé hardáin nua a chruthú do na blianta amach romhainn. Cuirfimid béim ar thionscadail bheaga agus mheánmhéide dúchasacha. Tá sé mar sprioc againn an leibhéal a ardúó 50% do 60% den bhfostaíocht iomlán ón bhfoinse sin agus an spleáchas ar infheistíocht ón taobh amuigh a laghdú chomh mór agus is féidir. Tá chomhpháirtíocht an-láidir eadrainn agus Fiontraíocht Éireann agus an IDA agus na Ranna eile lena mbaineann. Baineann an iomaíocht is mó againn le hAlban agus an Bhreatan Beag, san áit a bhfuil dálaíáirithe atá cosúil lena chéile.
TáÚdarás na Gaeltachta ag díol sócmhainní agus ag athchúrsáil an ioncaim thar 1970 i leith ó thráth go chéile. Cuireadh dlús leis an gcur chuige seo ón mbliain 2002 i leith chun an bhearna idir an t-ioncam a bhí ar fáil agus an caiteachas a bhí de dhíth a líonadh. Tá muid ag teacht go dtí an pointe anois go bhfuil cothromúá dhéanamh ar an soláthair atá ar fáil ón Státchiste agus na pointí eile agus gur bonus breise a bheidh ann don chlár forbartha as seo amach.
I gcomhthéacs díolacháin tithe saoire Eanach Mheáin i gConamara an bhliain seo caite, d'fhoghlaim muid ceachtanna áirithe ón gcéad chinneadh a rinneadh. Ghlac an bord le moltaí ag a chruinniú ar an 24 Meán Fómhair 2004 sular fógraíodh an mhaoin le haghaidh tairiscintí an dara huair, a leag amach treoirlínte nuashonraithe do dhíol agus cheannach maoine, agus meicníocht shoiléir scórála san áireamh. Thóg na treoirlínte sin san áireamh litir na Roinne den 21 Iúil 2004, an cód cleachtais um rialú comhlachtaí Stáit, comhairle abhchóide, na rialacháin maidir le cúnamh Stáit, agus deá-chleachtas coitianta. Coinneofar na treoirlínte seo faoi athbhreithniú rialta. Chomh maith leis sin tá freagrachtaí breise ar an cheannasaí airgeadais mar oifig sholáthair lena chinntiú go gcloítear le rialacha dlíthiúla agus riaracháin agus le cleachtais chearta maidir le soláthar poiblí agus díolacháin mhaoine agus trealaimh.
Ba mhaith liom tagairt bheag a dhéanamh don ghnó lasmuigh den Ghaeltacht a rinneadh tagairt dó ag chruinnithe roimhe seo. Rinneadh plé ag cruinniú an 2 Meitheamh agus rinne mé athbhreithniú ar an gcomhad ó shin. Fuair mé comhairle bhreise dlí faoi, chuir muid litir aisghairm an deontais amach chuig na daoine agus chuir mé chuig an Cathaoirleach comhad den chomhfhreagras idir mé féin agus na daoine sin. Ag éirí as an athbhreithniú sin agus an comhairle dlí, tá cinneadh déanta agam gan leanacht ar aghaidh níos faide leis an idirbheart seo.
Tá muid an-bhuíoch go raibh an deis seo againn teacht os chomhair an choiste agus má tá ceisteanna ag baill an choiste, freagróimid iad.