Tairgim go léighfear an Bille an dara uair. Do réir an Bhille seo, beidh cúiteamh le fáil ag na baill sin den Chéad Chath de sna Connaught Rangers, a bhí páirteach sa Cheannairc sna h-Indiacha sa bhliain, míle naoi gcéad is fiche, agus a daoradh, dá dheascaibh sin, chun báis, chun pian-tseirbhíse nó chun príosúntachta ar feadh dhá mhí dhéag ar a laighead. Thosnuigh an Cheannairc ag Jullundur an t-ochtú lá fichead de Mheitheamh, míle naoi gcéad is fiche, agus ag Solon an triochadadh lá den mhí chéadna. Labhair na fir i gcoinnibh na drochoibre bhí á dhéanamh in Eirinn an uair sin, agus dheimhnigheadar go seasóchaidís le Sinn Féin agus go dtaisbeánfaidís leis an gCeannaire sin, gur ghráin leo na mí-ghníomhartha bhí a ndéanamh ag saighdiúirí Shasana in Éirinn. D'iarradar go dtabharfaí na saighdiúirí sin as Éirinn agus dhiúltuigheadar a thuille saighdiúireachta dhéanamh go dtí go ndéanfaí san. Chuireadar brat Sinn Féin in áirde san dá áit, Jullundur agus Solon.
Ní raibh gach éinne bhain leis na h-aonaid de sna Connaught Rangers a bhís ar stáisiún ag Jullundur agus Solon páirteach sa Cheannairc. Bhí cuid acu ná gheobhadh leis an gCeannaire, agus cuid eile acu a bhí, béidir, i bhfábhar na Ceannairce ach nár thógadar páirt innte. Go dtí go ndéanfaí an dá dhream do dheighilt óna chéile agus Arm-Chúirt do bhunú chun na fir a bhí páirteach sa Cheannaire do thriail, cuireadh fé choinneáil na fír a bhain leis na h-Aonaid de sna Connaught Rangers a bhí ar stáisiún ag Jullundur agus Solon. Tháinig an Arm-Chúirt le chéile ag Dagshai an tríomhadh lá ficeadh de Lughnasa, míle naoí gcéad is fiche, agus cuireadh nócha ball de sna Connaught Rangers ar a dtriail. Seo iad na breitheanna tugadh ortha:—
(a) Do daoradh chun báis. (Cuireadh an bhreith seo i bhfeidhm).—1 (duine amháin).
(b) Do daoradh chun báis ach do h-athruigheadh go dtí piantseirbhís saoghail.—13 (trí dhuine dhéag).
(c) Do daoradh chun bliain is fiche pian-tseirbhíse.—6 (seisear).
(d) Do daoradh chun cúig bliana dhéag pian-tseirbhíse.—5 (cúigear).
(e) Do daoradh chun tréimhsí deifriúla ó bhliain go dtí deich mbliana.—36 (sé dhuine triochad).
(f) Cheal fiadhnaise, níor tugadh breith ar bith.—29 (naoi nduine fichead).
90 (nócha duine go léir).
Is inmheasta go raibh an duine is trí fichid dá dtagartar ag na litreacha (a) go (e) thuas páirteach sa Cheannaire. 'Na theannta san, marbhadh beirt de sna Rangers le linn na Ceannairce, agus fágann san go raibh trí dhuine seascad ar fad sa Cheannairc. Tar éis na Ceannairce, cuireadh dian-smacht i bhfeidhm san Aonad agus gearrtaí pionoisí troma mar gheall ar chiontaí na deintí aon ró-bhrí dhíobh roimhe sin toisc iad a bheith coitianta i ngnáthshaoghal gach Catha.
Meastar, dá bhrí sin, go mbéidir go mbéadh roinnt mhaith daoine ná raibh páirteach sa Cheannairc á rádh gur fhuilingeadar cruadhtan nó leathtrom nó gur cuireadh i bpríosún iad de dheascaibh na Ceannairce; agus mar gheall air sin, adeirtear i Mír 2 (c) den Bhille gurb é a tuigfear le "duine cáilithe" ná duine daoradh chun dhá mhí dhéag ar a laighead i bpríosún mar gheall ar ghabháil leis an gCeannairc.
Toisc a fhaid a bhí cuid de sna ceannaircigh san Arm mBriotáineach nuair a thárla an Cheannairc, ba thuigthe ceart a bheith acu chun pinsin fhad-sheirbhíse, agus fén mBille seo molfar dóibh pinsean a bheidh cómh maith is a gheobhaidís dá bhfanaidís san Arm mBriotáineach go mbéad bliain is fiche de sheirbhís sásúil tugtha acu agus dá mbéadh acu le linn a scurtha, an céim céadna bhí acu le linn na Ceannairce. Nuair a bheidh seirbhís na bhfear so á h-aireamh, ní dearmhadfar an tréimhse chaitheadar i bpríosún nó fé choinneáil ag feitheamh le na dtriail ná an tréimhse thugadar i bpríosún de bhárr na breithe tugadh ortha ag an Arm-Chuirt Ghenerálta do thriail iad. Éinne bheidh ag fáil luach saothair, pinsin nó liúntais as airgead puiblí (seachas pinsean créachta a bheidh iníoctha fén mBille seo) cuirfear a Phinsean Seirbhíse ar fiunraoi. Chífear sa tríomhadh Sceideal cad é an méid de'n Phinsean a cuirfear ar fiunraoi mar sin.
Maidir le ceannaircigh ná fuil ceart den tsórt san acu chun Arm-Phinsin Bhriotáinigh de bhárr fad-sheirbhíse, molfar dóibh fén mBille seo aisce sheirbhíse ná rachaidh thar chéad go leith púnt. Fén mBille so, freisin, beidh deontas breise le fáil ag éilitheoirí go bhfaghaidh Bord na nArm-Phinsean, ar iad do go bhfuilid fé mhí-ábaltacht de dheascaibh na Ceannairce, no de dheascaibh cúrsaí d'éirigh as an gCeannairc, ach an mhí-ábaltacht san a bheith có-ionann le fiche fén gcéad nó níos mó de mhí-ábaltacht iomláin, más mí-ábaltacht ó chréacht é, nó có-ionann le h-ochtó fén gcéad nó níos mó, más mí-ábaltacht ó ghalar é. Mar seo bheidh an deontas breise:
I gcás duine bheidh ag fáil pinsin sheirbhíse—pinsean eile de dheich scillinge sa tseachtmhain, má bhíonn an mhí-ábaltacht có-ionánn le céad fén gcéad agus suim níos ísle ná san, do réir méid na mí-ábaltachta, má bhíonn an mhí-ábaltacht níos lugha ná céad fén gcéad.
I gcás duine ná beidh ag fáil pinsin sheirbhíse ach a bheidh ag fáil aisce seirbhíse—pinsean de fiche scilling sa tseachtmhain, má bhíonn an mí-ábaltacht có-ionann le céad fén gcéad agus níos lugha ná san, do réir méid na mí-abaltachta, má bhíonn an mhí-ábaltacht níos lugha ná céad fén gcéad. Má bhíonn an mhí-ábaltacht ó chréacht nó ó dhíoghbháil níos lugha ná fiche fén gcéad, íocfar aisce chréachta nách mó ná triocha púnt. Déanfar fén mBille seo, leis, liúntaisí do dheonadh do bhaintreacha agus do chloinn cheannairceach a marbhadh le linn na Ceannairce nó gur créachta nó galar de dheascaibh na Ceannairce ba thrúig le n-a mbás má deineadh an pósadh an triochadadh lá de Mheitheamh, míle naoi gcéad is fiche, nó roimhe sin.
Seo mar bheidh na liúntaisí sin:
Baintreach — deich scillinge sa tseachtmhain.
Leanbhaí fé bhun sé bliana dhéag d'aois:
An chéad leanbh—cúig scillinge sa tseachtmhain.
Gach leanbh eile—trí scillinge sa tseachtmhain.
On gcéad lá de Dheireadh Fhóghmhair, míle naoi gcéad a ceathair triochad anuas, a h-íocfar pinsin agus liúntaisí fén mBille.