Tairgim:—
Go dtoghtar Proinnsias O Fathaigh agus go dtéighe sé i gceannas na Dála anois mar Cheann Comhairle.
That Deputy Proinnsias O Fathaigh be elected and do now take the Chair as Ceann Comhairle.
Is main liom an Teachta Proinnsias O Fathaigh do chur os comhair na Dála mar Cheann Comhairle. Tá breis agus dhá bhliain déag ann anois ó toghadh Proinnsias O Fathaigh mar Cheann Comhairle den chéad uair, agus d'athtoghadh é cúig uaire o shoin. Tá, mar sin, sean-taithí aige ar obair na Dála agus ar an slí inar chóir obair na Dála a stiúradh. Táim cinnte go bhfuil gach Teachta sásta leis an gcaoi a ndearna sé a chuid oibre. Thug sé cothrom na féinne do gach aon duine. Bhí sé lách agus cineálta i gcomhnaí. Sin é an t-aon lócht amháin atá air béidir, go raibh sé rud beag ró-bhog ar chuid de na daoine a bhí ag iarraidh teacht timpeall ar na rialacha agus ar bhuanorduithe na Dála. Caifimíd go léir cuidiú leis san obair sin, mar tá a lán lán oibre le déanamh anseo agus ceapaim go bhfuil a lán daoine, ar chuma ar bith, ar aon intinn go mba chóir é bheith níos déine ná mar do bhí. Ach, mar sin féin, tá mé cinnte go n-aontóidh sibh go léir liom gur dheachair éinne níos oireamhnaí fháil don phost ná é. Tá súil agam go dtoghfar d'aonghuth é. Mar sin, molaim go dtoghfar Proinnsias O Fathaigh chun bheith ina Cheann Comhairle agus go dtéighe sé i gceannas na Dála anois.