Ar an gcéad dul síos, ceapaim gur féidir cás a dhéanamh i bhfábhar na n-institiúidí éagsúla as a n-inniúlacht. Fiú amháin má fhágtar nithe conspóideacha as an áireamh, tá cás le déanamh ar son caiteachas a chur isteach chun riarachán agus eagar ceart agus eagrais chuí a chur ar fáil do na hiarsmalanna, na gailearaithe náisiúnta agus na hinstitiúidí eile. Glacaim leis, mura mbeadh an cheist eile san áireamh, agus dá mba rud é go raibh airgead ar fáil d'fhéadfaí an cheist a phlé cén chaoi ab fhearr é a chaitheamh.
Mar a luaigh mé sa fhreagra — agus fáiltím roimh an cheist — tá iarsmaí ar iasacht do na contaetha éagsúla: mar shampla, tá artefacts ar iasacht faoi láthair ag Fear Manach, Ciarraí, Tiobraid Árann theas, Leitir Ceanainn i nDún na nGall, Corcaigh, Muineachán, Loch Garman agus Luimneach. Is féidir liom samplaí a thabhairt maidir leis an Ghailearrí Náisiúnta. Tá 359 bpictiúr ar iasacht ag gailearaithe agus áiteanna eile ina gcomhlíontar na coinníollacha a luaigh mé. Déanfaidh mé mo dhícheall an cinneadh is fearr a dhéanamh ó thaobh an todhchaí de maidir le struchtúir na n-institiúidí éagsúla agus, i leith aon airgid bhreise, bheinn ag súil le cás a dhéanamh chun cúrsaí ealaíne, cultúir agus Gaeltachta a chur chun cinn.