Dáil Éireann debate -
Thursday, 4 Nov 1993

Vol. 435 No. 5

Written Answers. - Cursaí Calaíochta — Dún na nGall.

Dinny McGinley

Question:

23 D'fhiafraigh Mr. McGinley den Aire Ealaíon, Cultúir agus Gaeltachta an eol dó na mórdheacrachtaí maidir le cursaí calaíochta idir Toraigh, Inis Bó Finne agus Machaire Rabhartaigh; agus an gcuirfidh sé acmhainní ar fáil le céanna oiriúnacha a thógáil sna háiteanna sin.

Minister for Arts, Culture and the Gaeltacht (Mr. M. Higgins)

Is eol dom go maith na deacrachtaí maidir le cúrsaí calaíochta idir Oileán Thoraí, Inis Bó Finne agus Machaire Rabhartaigh agus tá cúnamh áirithe curtha ar fáil ag mo Roinnse le tamaillín anuas d'fhonn feabhas a chur ar na saoráidí éagsúla ag na hionaid sin.

Ceadaíodh deontas £12,000 i 1992 chun a chumasú do Roinn na Mara oibreacha feabhsúcháin a chur i gcrích ag Cé Mhachaire Rabhartaigh agus ag tús na bliana seo ceadaíodh deontas £8,000 chun a chumasú do Chomhairle Chontae Dhún na nGall oibreacha feabhsúcháin riachtanacha a dhéanamh ar an bpiara agus ar an bhfánán ag Inis Bó Finne. Tá an dá scéim sin críochnaithe anois.

Maidir le Oileán Thoraí cuireadh deontas c. £43,000 ar fáil ó mo Roinnse le go bhféadfadh Roinn na Mara suirbhéanna éagsúla móide staidéar mionsamhail a dhéanamh chun na saoráidí calaíochta ab oiriúnaí do riachtanais mhuintir Thoraí a aithint agus chun meastachán ar an gcostas a bhainfeadh leo a dhéanamh amach. De dhroim na suirbhéanna sin tá tuarascáil comhairleóirí ar fáil anois. Is í an chéad chéim eile ná tástáil suímh agus dearadh cuimsitheach a dhéanamh. Tá mé dochasach go ndéanfar iad sin an bhliain seo chugainn le cabhair deontais bhreise ó mo Roinnse.