Vol. 483 No. 5
85 D'fhiafraigh Mr. Barrett den Aire Ealaíon, Oidhreachta, Gaeltachta agus Oileán cén chabhair atá á tabhairt óna Roinn i leith ceol agus an daonchultúr traidisiúnta a fhorbairt ar fud na tíre; agus an ndéanfaidh sí ráiteas ina thaobh. [20639/97]
Tá cúnamh substaintiúil á chur ar fáil ag mo Roinnse chun cabhrú leis an gceol agus leis an daonchultúir traidisiúnta. Luaim ach go háirithe an deontas bliantúil a íoctar le Comhaltas Ceolteoirí Éireann (£195,000 ceadaithe do 1997), an tOireachtas (£110,000 ceadaithe do 1997), an Gael Acadamh (£31,000 ceadaithe do 1997) agus Siamsa Tíre (£30,000 ceadaithe do 1997). Ar ndóigh tríd is tríd bíonn ról ag na heagrais Ghaeilge a fhaigheann cúnamh ó mo Roinnse sa réimse gníomhaíochta seo, mar shampla, Gael-Linn trí imeachtaí cosúil le Slógadh. Bíonn cúnamh ar fáil freisin ó mo Roinnse ag dreamanna eile a bhíonn an ceol agus an cultúr traidisiúnta á gcur chun cinn acu ar fud na tíre. Tá cúnamh curtha ar fáil thar na blianta ag mo Roinnse chun ionaid Ghaeilge a fhorbairt i mbailte agus i gceantair éagsúla ar fud na tíre agus bíonn ceol agus rincí traidisiúnta mar chuid de na gníomhaíochtaí a bhíonn ar siúl sna hionaid sin.
Sna Gaeltachtaí, ar ndóigh, bíonn cúnamh ar fáil chun ionaid phobail agus hallaí a fhorbairt agus arís bíonn an ceol agus an daonchultúr traidisiúnta á gcur ar aghaidh iontu.
Comh maith leis an gcúnamh a bhíonn ar fáil ó mo Roinnse bíonn cúnamh ar fáil ó Bhord na Gaeilge agus ón gComhairle Ealaíon, dhá eagras Stáit atá faoi choimirce mo Roinne, d'imeachtaí den chineál seo. Foilsítear sonraí faoin gcúnamh a thugtar do thograí eagsúla i dTuarascálacha Bliantúla na nEagras sin.
86 D'fhiafraigh Mr. Barrett den Aire Ealaíon, Oidhreachta, Gaeltachta agus Oileán cén chabhair a chuireann sí ar fáil chun forbairt na drámaíochta Gaeilge a chur chun cinn; agus an ndéanfaidh sí ráiteas ina thaobh. [20640/97]
Íocann mo Roinnse deontas bliantúil substantiúil leis an gComhlachas Náisiúnta Drámaíochta (£108,000 ceadaithe do 1997) chun an drámaíocht i nGaeilge a chur chun cinn. Freisin íoctar deontas bliantúil le Taibhdhearc na Gaillimhe (£90,000 ceadaithe do 1997). Bíonn tacaíocht ar fáil freisin don drámaíocht go hindíreach ó mo Roinnse tríd an gcúnamh a chuirtear ar fáil d'eagrais Ghaeilge eile agus d'fhorbairt hallaí pobail agus ionaid Ghaeilge laistigh agus lasmuigh den Ghaeltacht.
Cuireann Bord na Gaeilge cúnamh ar fáil don drámaíocht Ghaeilge freisin, mar shampla, Amharchlann de hÍde. Tugtar sonraí faoin gcaiteachas sin i dTuarascálacha Bliantúla an Bhoird. Cuireann an Chomhairle Ealaíon cúnamh substaintiúil ar fáil don drámaíocht i gcoitinne agus tugtar sonraí faoin gcúnamh a íoctar i leith tograí éagsúla — tograí Gaeilge san áireamh — i dTuarascálacha Bliantúla na Comhairle.
87 D'fhiafraigh Mr. Sheehan den Aire Ealaíon, Oidhreachta, Gaeltachta agus Oileán cén chabhair a thugann a Roinn chun báid iascaigh a cheannach; cén plean atá aici don scéim as seo amach; agus an ndéanfaidh sí ráiteas ina thaobh. [20784/97]
D'fhonn cabhrú le hiascairí áirithe Ghaeltachta, arb í an Ghaeilge a ngnáth theanga labhartha, báid iascaigh a cheannach bhíodh deontas forlíontach de nach mó ná £5,000, nó 5 faoin gcéad de chostas inghlactha an bháid, ar fáil ó mo Roinnse — faoi réir coinníollacha áirithe — i leith báid nach faide ná 15 méadar a mbíodh cúnamh ina leith ceadaithe ag an mBord Iascaigh Mara.
