Rinne Teachtaí tagairt cúpla nóiméad ó shin do shiniciúlacht sa pholaitíocht i measc mhuintir na hÉireann. Dar liomsa agus leis an Chomhaontas Glas agus le go leor daoine eile cuireann dearchadh an Taoisigh i leith Partnership for Peace go mór leis an siniciúlacht sin. Tá athrú iomlán ar intinn an Taoisigh agus níl aon chúis tugtha don Dáil ar cén fáth go bhfuil an t-athrú chomh hiomlán sin.
Anuas ar sin tá ceist airgeadais os ár gcomhair leis an Social Partnership. Tá orainn féachaint go géar ar chothrom na féinne a thabhairt do dhaoine atá ag fulaingt faoin eacnamaíocht agus faoin chóras atá i réim faoi láthair. Baineann sin le cúrsaí sláinte, scolaíocht, tithíocht, iompar poiblí, bochtanas agus go leor eile. Ach is beag duine atá ag caint faoi chostas cogaíochta. Má tá an Rialtas i ndáiríre faoi Partnership for Peace tá sé de dhualgas orthu a rá linn cé chomh costasach is atá cogaíocht mar is cogaíocht atá i gceist le Partnership for Peace. Mar shampla, chosnaigh sé £6m ar NATO droichead amháin thar an Danube a scrios i Kosovo agus cosnóidh sé £10m chun é a aththógáil. Chosnaigh an buamáil ar far a rinne NATO i Kosovo £2.6 billiún agus ceaptar gurb é praghas an aththógála ná £30 billiún .
I gcomparáid leis seo chun íoc as fiacha fiche de na tíortha is boichte ar dhomhan, ní chosnóidh sé ach £3 billiún. Tá fhios againn gur $35 billiún an praghas ar an Phólainn, Poblacht na Czech agus an Ungáir chun íoc as interoperability, mar a thugtar air, sé sin an treallamh míleata ar fad atá le ceannach chun dul in oiriúnt do NATO.
Ní hamháin go mbeidh Partnership for Peace an-chostasach do mhuintir na hÉireann nuair atá partnership sóisialta i mbaol a bháis cheana féin ach ní bheidh aon smacht dáiríre ag pobal na nÉireann ar ghníomhaíochtaí PfP.
Níl rud ar bith sa Framework Document ag PfP a deir go mbeidh sainordú na Náisiún Aontaithe riachanach chun tabhairt faoi "crisis management". Mar an gcéanna leis na Petersburg Tasks faoi Chonradh Amsterdam. Níl ráite in aon áit go mbeadh sainordú riachtanach.
Abraimis slán mar sin le daonlathas na tíre i gcúrsaí slándála amach anseo. Comhaontú míleata san Aontas Eorpach a bheidh romhainn. Abraimis slán chomh maith le neamhspleachas intinne agus le meas idirnáisiúnta i measc na dtíortha is boichte. Ar nós "Animal Farm" le George Orwell is iad Fianna Fáil, Fine Gael agus ceannaireacht Pháirtí an Lucht Oibre na muca sa scéal seo, a bheidh sásta béilí a ghlacadh leis na daoine céanna atá ag imirt cos ar bholg ar chosmhuintir an domhain.
Dá mbeadh Raymond Crotty beo fós táim cinnte go mbeadh Reifreann againn ar an cheist seo. Ach tá spiorad bródúil síochánta Crotty fós beo i gcroíthe go leor daoine ar nós mo chomhleacaithe sa Chomhaontas Glas agus i gcroíthe go leor grúpaí creidimh, carthanachta, polaitúla agus síochánta a thuigeann go maith gur feall ar phobal na hÉireann agus ar shíocháin domhanda agus ar na Náisiúin Aontaithe é ballraíocht na tíre seo i PfP.
Is tír bheag sinn. Tá an Cold War thart. Cad tá romhainn mar mhuintir an domhain? Fiacha na dtíortha mbochta? Míchothromaíocht idir daoine saibhre agus bochta? Cad is cóir dúinn a dhéanamh? Tá rogha againn. Is cóir gníomhú faoi na Náisiúin Aontaithe mar idirghabhálaí idir tíortha na hEorpa agus Stáit Aontaithe Mheiriceá agus ar an taobh eile, na tíortha bochta. Tíortha cosúil linne na tíortha bochta sin, ó thaobh na staire de.
Cén fáth mar sin go bhfuil PfP ag titim amach? Dar liom, tá an brú ag teacht ón tionsclaíocht airm. Tá an Cold War thart agus tá margaí nua uathu. Níl na Náisiúin Aontaithe ag iarraidh orainn dul isteach sa PfP. Níl pobal na tíre ag iarraidh orainn na billiúin a chaitheamh ag ceannach trealamh míleata. In ionad sin, tá pobal na hÉireann ag iarraidh orainn airgead a thabhairt don chóras sláinte, d'ospidéil, do scoileanna, don chóras taistil phoiblí, to thógáil tithe, do chóras athchúrsáil dráimhaoile, do chórais séarachais, d'áiseanna súgradh do leanaí agus do dhaoine óga, agus mar sin de. Ach tabhair faoi ndeara nach bhfuil an Rialtas ag iarraidh ar an Dáil labhairt faoi na gnéithe sin go meánoíche mar a tharla coicíos ó shin.
Deir ceannairí NATO go bhfuil an deighilt idir NATO agus PfP razor thin agus léiríonn an díospóireacht seo go bhfuil an deighilt idir na páirtithe móra sa Tigh seo razor thin chomh maith. D'fhéadfaí an rud céanna a rá faoi na príomh nuachtáin, Irish Times agus Irish Independent ach go háirithe. Ach is mór an deighilt idir ballraíocht na tíre seo i PfP agus an Bhunreacht, go mór mhór Airteagal 27 a luann móráltacht idirnáisiúnta. Cad is móráltacht idirnáisiúnta ann ag cur san áireamh buamáil agus marú leanaí in Iraq agus Kosovo agus gan faic a dhéanamh i Timor Thoir cuir i gcás.
Deir an Bhunreacht go gcaithfimid a bheith ag gníomhú go síochánta. Ach cad a chiallaíonn "go síochánta" nuair a chuireann tú PfP agus NATO agus first strike nuclear warfare san áireamh?
Tá sé ráite sa Bhunreacht chomh maith go gcaithfimid a bheith ag gníomhú faoi bhun-rialacha idirndáisiúnta. Ní thuigim é sin nuair nach mbeimid faoi smacht na Náisiún Aontaithe a thuilleadh. Tá ballraíocht na tíre seo i PfP míbhunreachtúil dar liomsa. Gan Reifreann beidh an Dáil seo ag teacht salach ar théarmaí na Bunreachta.
Ba mhaith liom buíochas a ghabháil le pobal na Gaeilge a labhair amach go tréan le blianta anuas i gcoinne Partnership for Peace. Le cúnamh Dé beidh ar a laghad cúlbhinseoirí i Fianna Fáil ach go háirithe sásta seasamh suas agus a bheith misniúil faoi seo agus gan a bheith ag teacht leis an chlár oibre atá leagtha síos ag na daoine is cumhachtaí ar domhan agus is measa ó thaobh a bheith ag imirt cost-ar-bholg ar chosmhuintir an domhain.