Dáil Éireann debate -
Tuesday, 27 Mar 2001

Vol. 533 No. 3

Written Answers. - Biúró Eorpach do Theangacha Neamhfhorleathana.

Dinny McGinley

Question:

260 D'fhiafraigh Mr. McGinley den Aire Ealaíon, Oidhreachta, Gaeltachta agus Oileán i ngeall ar an mórbhaol atá ann go ndruidfear oifig an Bhiúró Eorpaigh do Theangacha Neamhfhorleathana i mBaile Átha Cliath de dheasca éilimh mhíréasúnta ón Choimisiún Eorpach chun athruithe a chur i bhfeidhm ar struchtúr an bhiúró agus toisc go ndearnadh obair fhónta cheannródaíochta le beagnach fiche bliain anuas san oifig seo agus go bhfaigheann an biúró deontas-i-gcabhair bliantúíl ón Roinn Ealaíon, Oidhreachta, Gaeltachta agus Oileán, an bhfuil an tAire sásta ceist thodhchaí na hoifige a thógáil leis an gCoimisiún agus sa chás nach bhfaigheann sí freagra sásúil uathu, an mbeadh sí sásta ról na Roinne i gcur chun cinn na Gaeilge agus teangacha eile mar í san Aontas Eorpach a athbhreithniú. [8749/01]

Minister of State at the Department of Arts, Heritage, Gaeltacht and the Islands (Ms Coughlan)

Tuigtear dom go bhfuil iarrtha ag Coimisiún an Aontais Eorpaigh ar an mBiúró Eorpach do Theangacha Neamhfhorleathana a chuid costas i gcoitinne a scrúdú chun a chinntiú go bhfuil an luach is fearr is féidir á fáil ar an maoiniú Eorpach a thugtar don bhiúró. Mar chuid den scrúdú sin tá na costais a bhaineann leis an oifig i mBaile Átha Cliath a gcíoradh. Is go neamhfhoirmiúil a tugadh scéal do mo Roinnse maidir lena bhfuil ar siúl. Má fhaighim leargas i scribhín ar an bhfadhb maidir leis an mbaol go ndúnfar an oifig i mBaile Átha Cliath, más fíor, féachfaidh mé cad is féidir liom a dhéanamh i dtaca le stádas na hoifige sin a chaomhnú.