Vol. 564 No. 5
431 D'fhiafraigh Mr. Kenny den Aire Gnóthaí Pobail, Tuaithe agus Gaeltachta cén fáth a bhfuil gearradh siar 11% ar bhuiséad Fhoras na Gaeilge i mbliana, agus an luafaidh an tAire an méid postanna a chaillfear as ucht an ghearrtha siar seo; agus an ndéanfaidh sé ráiteas ina leith. [9807/03]
Tá dhá áisínteacht ar leith ann a chuimsíonn An Foras Teanga, is iad sin Foras na Gaeilge agus Tha Boord o Ulster Scotch.
Faoi mar is eol don Teachta, tá soláthar de €12.416 milliún don bhForas Teanga do 2003. Chomh maith leis sin, beidh cistíocht bhreise anuas ar an méid sin á cur ar fáil dó ag an Roinn Cultúir, Ealaíon agus Fóillíochta sa Tuaisceart de réir na gcoibhneas atá aontaithe.
Ní mór an laghdú nuair a chuirtear soláthar 2002 i gcomhthéacs an mhéadaithe ollmhór ar an gcúnamh atá curtha ar fáil ón Státchiste don eagraíocht le blianta beaga anuas – ó €7.557 milliún i 2000 go €14 milliún anuraidh.
Maidir le postanna a chailliúint de bharr an laghdaithe seo, tá mé iomlán muiníneach go mbeidh an dá áisínteacht, agus na heagrais dheonacha atá ag brath orthu, in ann leanúint de chlár iomlán a chur chun feidhme leis an soláthar airgid atá ar fáil dóibh don bhliain reatha.
432 D'fhiafraigh Mr. Kenny den Aire Gnóthaí Pobail, Tuaithe agus Gaeltachta an inseoidh an tAire an bhfuair sé comhairle oifigiúil ó choiste a bhunaigh sé féin i leith bhuiséad na Roinne agus ar tugadh comhairle dó gan cur isteach ar bhuiséad Fhoras na Gaeilge toisc an foras a bheith faoi scáth na bhForas Trasteorann agus an ndéanfaidh sé ráiteas ina leith. [9821/03]
Glacaim leis gurb é atá i gceist ag an Teachta ná an tuairisc a cuireadh ar fáil ag an ngrúpa Athbhreithnithe Meastacháin a chuir an Rialtas ar bun chun comhairle a thabhairt maidir le buiséid na Ranna Stáit go léir. Níor bhunaigh mé féin aon choiste chun comhairle a thabhairt dom faoi bhuiséad mo Roinne-se.
