Tá súil agam go mbeidh cead agam beagán a rá i dtaobh an Ailt seo den Bhille. Ba mhaith liom a rá go bhfuil mé i bhfábhar an Ailt agus ba mhaith liom a rá, thar ceann na ndaoine atá ar an taobh seo den Teach, agus atá in aon pháirtí liom, gur maith linn an tAlt seo a bheith sa mBille. Caithfidh mé a rá, tar éis bheith ag éisteacht leis an diospóireacht an tseachtain seo caite, go raibh faitíos orm go b'fheidir go loitfí cúrsaí an Bhille sa tSeanad trí leasú a chur isteach sa mír seo. D'éisteamar go foighdeach leis an Seanadóir Bigger an tseachtain seo caite agus é ag cur síos ar an Acht arb é is ábhar don Alt seo. Bhí sórt faitís orm mar gheall ar a mhíshásta a bhí sé agus mar gheall ar a mhéid a bhí sé in amhras ar bona fides an Rialtais i dtaobh an Ailt seo, go mb'fhéidir go mbraitheadh sé de dhualgas air féin leasú a chur isteach. Tá mé an-tsásta nár chuir sé a leithéid isteach. Mhillfheadh sé cúrsaí an Bhille agus mhillfeadh sé an aondacht atá in ár measc fré chéile i dtaobh tábhacht an Achta seo a dhul ar ceal. Is dóigh liom gurb é an fáth nach bhfuil aon chur i gcoinne an Ailt seo ná gur léir do gach duine sa tSeanad, sa Dail agus taobh amuigh nach bhfuil aon amhras a thuille ann i dtaobh status an Stáit seo. Ar feadh blianta bhí amhras ar dhaoine—is doigh liom go raibh údar acu, údar ag a lán acu, amhras a bheith orthu—i dtaobh status an Stáit.
Níl mé sásta a rá go bhfuil an leithscéal sin ag gach duine. Tá daoine ann, agus is dóigh liom go dtaispeáinfidh mé ar ball é, nach raibh aon ghá go mbeadh mí-thuiscint ar chuid mhaith acu agus da mba rud é go mbeadh daoine níos fonnmhaire mó ná bhíodar breathnú ar an bhfhírinne idir an da shúil, nach mbeadh an oiread sin amhrais ná an oiread sin easaontais sa tír agus bhí.
An mhír seo, Alt I, agus an réiteach atá inti; go gcuirfear an tAcht Caidreamh Coigríche ar ceal, admhachtáil é sin, ann féin, ar neamhspleáchas iomlán an Stáit seo. Marach go bhfuil Bunreacht na tíre ag tabhairt na cumhachta dhúinn, marach go bhfuil an Pháirliméid seo neamhspleách go hiomlán, ní fhéadfaí an mhír seo a chur isteach sa mBille. Ach an raibh gá leis an amhras bheith ann, an oiread agus a bhí? An Taoiseach é féin in áiteacha, is léir—tá mé sásta é sin admhachtáil— go raibh amhras air, agus a údar aige. Níl mé sásta go bhfuil údar aige agus amhras bheith air an t-am ar fad, nó faoi gach rud; ach chuir sé ceist antábhachtach ar Dháil Éireann, nuair a bhí sé ag caint ar an mBille, nuair a bhí sé ós comhair an Tí sin. Dúirt sé ar cholún 372, iml. 113:—sí an cheist a bhí ag déanamh buartha dhó san am: an rabhamar taobh istigh den Comhchiníochas, an raibh Rí os cionn na hÉireann:
"We have not been able to find out or to get a specific answer to that question, whether we were or were not a member of the Commonwealth of Nations."
Sin ceist réasúnach: an rabhamar taobh istigh den Chomhchiníochas nó nach raibh? Dá gcuireadh daoine thíos faoin tír nó, béidir, cuid againn sa tSeanad nó sa Dáil, ceist den tsórt sin, go n-abróimis go rabhamar in amhras, béidir go mbeadh leithscéal éigin againn; ach níl mise ar na daoine a déarfadh go bhfuil an leithscéal sin ag an Taoiseach, ná ag Árd-Chounselléirí a bhí ar aon intinn leis cur i gcoinne an Bhille ar an mbealach a bhíodar. Tugaim faoi deara gur luadh na nithe seo cheana sa Dáil agus taobh amuigh de. Sílim go raibh sé riachtanach dúinn go gcuirfimis ar Thuarascáil an tSeanaid é, an chaoi díreach a bhí an scéal san am atá caite.
B'fheidir, ag an am seo, nach mbeadh sé as bealach má abraím chomh mí-shásta agus tá mise go háirithe agus chomh mí-shásta agus tá an mhuintir ar an taobh seo liom mar gheall ar nach bhfuaireamar cóip de Thuarascáil an tSeanaid go dtí a haon an chlog inniu. Cinnte, is dóigh gur cuireadh isteach sa mbosca aréir í nó am éigin inné, ach ní bhfuair mise mo chóip i gcóir an Diardaoin agus na hAoine seo caite go dtí a haon an chlog inniu. Ar ócáideacha, is cuma, béidir, faoi sin; ach ar ócáid den tsórt seo, agus Bille chomh tábhachtach leis an mBille seo, agus Imeachta chomh tábhachtach leis na hImeachtaí a bhí ar bun sa Seanad, Diardaoin agus Dé hAoine na seachtaine seo caite, is dóigh liom nach ceart nach bhfaighmis, ar ais nó ar éigin, cóip de na hImeachta, tamaill roimh an gcruinniú.
Nílim ag cur aon mhilleán ar aoinne a bhaineas leis an Taoiseach nó leis an gCléireach, ach is ceist í go gcaithfidh an Coiste um Phríbhléidí a scrúdú, agus féachaint chuige nach dtárlóidh a leithéid arís.