Ba mhaith liom beagán a rá i dtaobh teidil an Bhille. Seachtain ó shoin, nuair bhí an Bille ós ár gcómhair, mhol mé don Aire machtnamh a dhéanamh ar an scéal seo arís agus féachaint an bhféadfadh sé an nós a bhí ann go dtí seo i gcás cóluchta Stáit, go mbeadh an teideal i nGaeilge i gcás an Bhille seo. Is trua liom nach raibh am agam fanacht le héiseacht leis an Aire ag tabhairt freagra ar na pointí a cuireadh os a chómhair. Bhí mé ag súil i rith na seachtaine go mbeadh an tuarascáil oifigiúil agam go bhfeicfinn cén freagra a bhí ag an Aire ar an bpointe sin go háirithe, chomh maith leis na pointí eile. Ní bhfuaireas an tuarascáil oifigiúil go dtí 1 a chlog, nuair tháinig mé isteach ins an Teach inniu. Níl mé a rá gur ar an Aire atá an milleán faoi sin ach is dóigh liom nach bhfuil sé réasúnach iarraidh orainn teacht chuig an tSeanad agus cur síos a dhéanamh ar Bhille, ar gach céim, gan an deis a bheith againn an díospóireacht a rinneadh ar an mBille roimhe a bheith ós ár gcomhair. Níl fhios agam go cruinn céard tá ráite ag an Aire i dtaobh teidil an Bhille ach, do réir mar is féidir liom a dhéanamh amach, ceapann sé nach ceart dó teideal Gaeilge a chur ar an ngníomhaireacht seo.
Dá mbeadh am agam an tuarascáil a léamh, b'fhéidir go bhfeicfinn argóint éigin ag an Aire a shásódh mé i gcoinne an teideal a bheith i nGaeilge. Sílim go rachaidh sé rite leis, dá fheabhas a mbeadh freagra air, mé a shásamh gurb é an t-aon rud amháin a dhéanamh —teideal Béarla a bheith ag an ngníomhaireacht seo.
Ba mhaith liom iarraidh ar an Aire geallúint a thabhairt dúinn idir seo agus an chéad chéim eile, go gceapfaidh sé leasú amach agus go gcuirfidh sé isteach ins an mBille é, ag cur ainm Gaeilge ar an ngníomhaireacht nua seo.
Nílmid ag iarraidh a lán air ar bhealach agus ar bhealach eile táimid ag iarraidh a lán. Is ceist prionsabail í seo. Is ceist an-mhór í seo, scéal na Gaeilge, agus úsáid a dhéanamh den Ghaeilge ar gach ócáid dár féidir linn úsáid a dhéanamh di.
Ins na blianta atá caite, nuair tháinig Bille ós ár gcomhair go mba é a chuspóir bord nó cólucht nó fonndúiracht a bhunú, cuireadh an t-ainm i nGaeilge air. Ba mhór an trua go mbrisfí ar an nós sin, ní hé amháin ó thaobh a thábhachta i gcúis na Gaeilge ach ón taobh, muna ndeintear é, gur fianaise, gur cruthú, é, gur cuma leis an Rialtas scéal seo na Gaeilge.
Nílmid ag iarraidh ar an Aire go ndéanfadh sé obair an bhoird i nGaeilge. Níl sé sin ar intinn againn agus níl sé ar intinn againn mar a ceapfaí ón méid a dúirt sé in a thaobh—níl sé léite chomh cruinn sin agam agus ba mhaith liom—gurb é atá ar intinn againn go gcraobhscaoilfí an nuacht i nGaeilge ar fud gach régiún. Mar deirim, nílmid á iarraidh sin. Nílmid ach ag iarraidh an t-ainm Gaeilge atá ar bharr an Bhille, sé sin, Gníomhaireacht Nuachta Éireannach, gurb in é a bheas mar theideal ar an gcomhlachas nua seo. Níl bac ar bith ar an gcomhlucht—rud a dhéanfadh cinnte é—leagan gearr nó coimre a dhéanamh ar an teideal. Níl bac ar bith orra é sin a dhéanamh ach beid an teideal Gaelach mar chomhartha gurb í an Ghníomhaireacht Nuachta Éireannach a bheadh i gceist.
Ní dóigh liom, ó thaobh an Bhille féin, go bhfuilmid ag iarraidh a lán ar an Aire, ach ó thaobh prionsabail de, is rud an-tábhachtach ar fad é. Ba mhaith liom go dtabharfadh an tAire an méid sin de shásamh dúinne—atá ag plé leis an nGaeilge—go ndéanfadh sé, mar a rinneadh ins na blianta roimhe, i gcásanna eile dá leithéid seo, a tháinig ós comhair an Oireachtais, an teideal a chur i nGaeilge. Tá súil agam go bhfuil machtnamh déanta ag an Aire agus go mbeidh sé réidh an méid sin a dhéanamh orainn.
Maidir leis an rud eile adúirt mé i dtaobh na dtuarascála oifigiúil, má táimid le dul ar aghaidh ar an nós seo, gan an tuarascál oifigiúil a fháil go dtí go bhfuilmíd ar tí theacht isteach ins an tSeanad, séard a mholfainn duitse, a Chathaoirligh, agus a mholfainn don Seanad: éirí as costas a chaitheamh ar an tuarascáil oifigiúil ar fad. Ní fiú deich triuf í anois. Níl a lán ama agam mar atá ag daoine eile agus caithimíd na tuarascála a léamh chun a fháil amach céard atá i gceist ins an mBille. D'iarr mé ort cheana an scéal seo a scrúdú ach tar éis do dhícheall a dhéanamh, níl feabhas ar an scéal, agus, mar deirim, ní fiú deich triuf an tuarascáil atá againn anois, an tuarascáil a tugadh dúinn agus sinne ag teacht isteach anseo. Má chítear do Chléirigh an tSeanaid am ar bith nach mbeidh an tuarascál oifigiúil réidh in am tráth——