Dáil Éireann Debate, Tuesday - 8 November 2011
293 D’fhiafraigh Éamon Ó Cuív den Aire Ealaíon, Oidhreachta agus Gaeltachta an bhfuil deontais ar fáil óna Roinn le cabhrú le grúp-scéimeanna uisce Gaeltachta; agus mura bhfuil cén uair a cuireadh an scéim ar fionraí agus ar fógraíodh é seo go poiblí; agus an ndéanfaidh sé ráiteas ina thaobh. [33123/11]
View answer294 D’fhiafraigh Éamon Ó Cuív den Aire Ealaíon, Oidhreachta agus Gaeltachta cé mhéid iarratas ar dheontas a rinneadh faoi scéim deontais na ngrúp-scéimeanna Gaeltachta ó chuireadh an scéim ar fionraí, méid na ndeontas a lorgaíodh san iomlán, líon na scéimeanna a bhí i gceist; agus an ndéanfaidh sé ráiteas ina thaobh. [33124/11]
View answer295 D’fhiafraigh Éamon Ó Cuív den Aire Ealaíon, Oidhreachta agus Gaeltachta an bhfuil sé i gceist aige an scéim deontais do ghrúp-scéimeanna a athoscailt; agus má tá cén uair atá sé i gceist é sin a dhéanamh; agus an ndéanfaidh sé ráiteas ina thaobh. [33125/11]
View answer296 D’fhiafraigh Éamon Ó Cuív den Aire Ealaíon, Oidhreachta agus Gaeltachta cén soláthar a rinneadh i meastacháin na Roinne don bhliain 2011 do scéimeanna uisce agus séarachais; an méid atá caite go dáta; agus an ndéanfaidh sé ráiteas ina thaobh. [33126/11]
View answerTá i gceist agam Ceisteanna Uimh. 293, 294, 295, agus 296 a thógáil le chéile.
Faoi mar is eol don Teachta, tá scéim ag mo Roinn faoina gcuirtear cúnamh ar fáil do ghrúpscéimeanna uisce agus séarachais sa Ghaeltacht. Cé nach bhfuil an scéim sin curtha ar fionraí go foirmiúil, níl mo Roinn ag glacadh le hiarratais nua faoin scéim faoi láthair de bharr méid na ngealltanas atá ar láimh aici. Go deimhin, cuireadh in iúl d'fhiafraitheoirí éagsúla ó chomhairlí contae ó thús na bliana seo — ar a n-áirítear cás amháin ó Chontae Mhaigh Eo a luadh go sonrach — nach bhfuil mo Roinn ag glacadh le hiarratais nua faoin scéim.
Cuireadh soláthar €20,000 ar fáil don scéim in 2011 le freastal a dhéanamh ar scéimeanna atá ceadaithe le tamall. Cé nach bhfuil an soláthar seo caite go fóill, táim dóchasach go mbeidh a dhóthain ann le freastal a dhéanamh ar na riachtanais a bheidh ann i mbliana.
