An Fhoireann Rannach

Dáil Éireann Debate, Tuesday - 16 December 2014

Tuesday, 16 December 2014

Questions (346)

Éamon Ó Cuív

Question:

346. D'fhiafraigh Deputy Éamon Ó Cuív den Aire Cosanta an bhfuil iniúchadh déanta fós ar na poist agus na réimsí oibre ina mbeidh státseirbhísigh atá inniúil sa Bhéarla agus sa Ghaeilge ag teastáil, de réir mar a thug an Roinn Caiteachais Phoiblí agus Athchóirithe treoir don Roinn a dhéanamh; má tá an t-iniúchadh déanta, cad é líon agus cad iad céimeanna na bpost atá i gceist; cén líon de na poist sin a bhfuil duine leis an gcumas cuí Gaeilge agus Béarla ann cheana féin; cén plean atá ann chun na poist eile a líonadh le daoine a bhfuil na cáilíochtaí cuí acu; cén cháilíocht Ghaeilge atá riachtanach do na poist sin; agus an ndéanfaidh sé ráiteas ina thaobh. [48371/14]

Written answers

Minister for Defence

De bhun chinneadh an Rialtais bearta nua a thabhairt isteach chun tacú le hinniúlacht i nGaeilge sa státseirbhís, d’iarr an Roinn Caiteachais Phoiblí agus Athchóirithe ar Ranna poist/réimsí oibre a éilíonn daoine atá in ann feidhmiú sa dá theanga a aithint agus iad a chur san áireamh sa Phlean do Lucht Shaothair na Roinne. I ndiaidh an t-iarratas ón Roinn Caiteachais Phoiblí agus Athchóirithe a bhreithniú, níor aithníodh aon phost ná aon réimse oibre faoi leith sa Roinn Cosanta a éilíonn dátheangachas feidhmeach. Tá leibhéal áirithe inniúlachta i nGaeilge de dhíth ar an bhfoireann chun oibleagáidí faoi Acht na dTeangacha Oifigiúla a chomhlíonadh agus chun cuidiú le déileáil le corrfhiosrúchán i nGaeilge. Coinníonn an Roinn liosta de bhaill foirne atá toilteanach seirbhísí a chur ar fáil trí Ghaeilge má iarrtar sin orthu agus is leor sin chun freastal ar ár riachtanais ina leith.