Dhearbhaigh suirbhé ar bhaill foirne, a cuireadh i gcrích in 2012 le heolas a fháil faoi leibhéal an éilimh á bhraistint ag an Roinn ar sheirbhísí trí mheán na Gaeilge, gur fíoríseal ar fad líon na gcumarsáidí faighte i nGaeilge le blianta beaga anuas. Toisc nach bhfuil athrú tagtha ar an scéal ó shin i leith, níl aon phost aitheanta ag mo Roinnse ina próiseas pleanála d'fhórsa saothair áit ina bhfuil inniúlacht sa Ghaeilge mar réamhriachtanas dá chuid.
I gcomhréir lenár gcuid oibleagáidí faoi Acht na dTeangacha Oifigiúla, 2003, tá mo Roinnse tiomanta don chumarsáid le cliaint ar mian leo a gcuid gnó leis an Roinn a dhéanamh trí mheán na Gaeilge. Tá socruithe i bhfeidhm áit ina bhfuil naonúr ball foirne tagtha chun cinn ar bhonn deonach le páirt a ghlacadh i gcúrsaí oiliúna iomchuí lena gcuid scileanna Gaeilge a fheabhsú. Tá an oiliúint seo á soláthar ionas go mbeidh cohórt ball foirne againn ar féidir leo cuidiú le haonaid ghnó freagra a thabhairt do chliaint ar mian leo cumarsáid trí mheán na Gaeilge.
Beidh cumas mo Roinne féin cumarsáid le custaiméirí ar mian leo a gcuid gnó a dhéanamh trí mheán na Gaeilge á choinneáil faoi athbhreithniú i gcomhthéacs Scéim Ghaeilge 2014-2017 na Roinne agus beidh súil á choinneáil freisin ar mhéadú ar bith san éileamh óna leithéid de chustaiméirí ar an saoráid seo. Cuireadh an Dréachtscéim Ghaeilge 2014-2017 faoi bhráid na Roinne Ealaíon, Oidhreachta agus Gaeltachta le haghaidh faofa in 2014, i gcomhréir le forálacha Acht na dTeangacha Oifigiúla, 2003.
