Bord Údarás na Gaeltachta

Dáil Éireann Debate, Tuesday - 17 February 2015

Tuesday, 17 February 2015

Questions (544)

Éamon Ó Cuív

Question:

544. D'fhiafraigh Deputy Éamon Ó Cuív den Aire Ealaíon, Oidhreachta agus Gaeltachta cén líon ball d’Údarás na Gaeltachta a ainmníonn comhairlí contae; cén líon atá ann faoi láthair; cé mhéad folúntas atá ann i láthair na huaire do bhaill a ainmníonn comhairlí contae; cén uair atá folúntais ann agus cén uair a rinne an chomhairle contae atá i gceist duine a ainmniú leis an bhfolúntas a líonadh; cé chomh fada is gur féidir leis an Aire fanacht gan an té atá ainmnithe ag comhairle contae a cheapadh ar an mBord; an bhfuil aon teacht aniar ag an gcomhairle contae i gcás go ndiúltíonn an tAire an té atá ainmnithe acu a cheapadh; cén fáth go bhfuil moill leis an duine nó na daoine atá ainmnithe ag comhairli contae faoi láthair a cheapadh; an bhféadfadh an tAire moill a chur ar cheapachán mar nár réitigh sí le polaitíocht an té atá ainmnithe in aon chás; agus an ndéanfaidh sí ráiteas ina thaobh. [6678/15]

Written answers

Minister of State at the Department of Arts, Heritage and the Gaeltacht

Faoi Acht na Gaeltachta 2012, ceapann an tAire seachtar comhalta, an cathaoirleach san áireamh, ar bhord Údarás na Gaeltachta. Ina theannta sin, ainmníonn comhairlí contae, a bhfuil ceantar Gaeltachta ina ndlínse, an cúigear comhalta eile don Aire i gcomhar ceapacháin. Faoin Acht, ní rachaidh téarma oifige na gcomhaltaí thar chúig bliana agus ní cheapfar comhaltaí chun oifige ar feadh níos mó ná dhá théarma i ndiaidh a chéile. I gcás comhaltaí atá ainmnithe ag comhairlí contae na Mí, Phort Láirge agus Chorcaí, is tréimhse dhá bhliain a bhíonn ag na comhaltaí sin.

D'fhógair mé an tseachtain seo caite go raibh ainmní Chomhairle Contae Chorcaí, Aindrias Ó Muineacháin, ceaptha agam ar bhord Údarás na Gaeltachta don tréimhse 10 Feabhra 2015 go dtí 9 Feabhra 2017. Fágann sé sin nach bhfuil aon fholúntas ar an mbord faoi láthair i gcás comhaltaí a ainmníonn comhairlí contae.