Dáil Éireann Debate, Wednesday - 11 March 2015
38. D'fhiafraigh Deputy Éamon Ó Cuív den Aire Ealaíon, Oidhreachta agus Gaeltachta cé mhéad airgead atá ar fáil, i mbliana, chun an Straitéis Fiche Bliain don Ghaeilge 2010 - 2030 a chur i bhfeidhm; cé mhéad cruinniú den Fhochoiste Aireachta ar an nGaeilge ar fhreastail sí orthu, ó ceapadh ina hAire í; agus an ndéanfaidh sí ráiteas ina thaobh. [10020/15]
View answerI dtús báire, ní miste a rá go bhfuil an Straitéis 20 Bliain don Ghaeilge fite fuaite le gníomhaíochtaí mo Roinne thar na réimsí Gaeilge agus Gaeltachta go léir. É sin ráite, cuireadh allúntas ar leith de €0.5m ar fáil don chéad uair riamh don Straitéis i Vóta mo Roinne anuraidh. Caitheadh an t-airgead sin ar ghníomhaíochtaí breisluacha ar leith chun tacú leis an Straitéis agus leis an bpróiseas pleanála teanga faoi Acht na Gaeltachta. Is ar mhaithe leis na haidhmeanna céanna a chur i gcrích a chaithfear an t-allúntas méadaithe de €0.551m atá ar fáil don Straitéis i Vóta mo Roinne i mbliana.
Ón uair gur ceapadh mé mar Aire Stáit, bhí dhá chruinniú den Choiste Rialtais faoin nGaeilge agus faoin nGaeltacht ann ar a d’fhreastail mé féin agus an tAire Humphreys. Reáchtáladh an dá chruinniú seo ar an 29 Meán Fómhair agus an 8 Nollaig 2014. Táthar ag súil leis go mbeidh an chéad chruinniú eile den Choiste Rialtais ar an 30 Márta 2015.
