Seirbhísí Oileán

Dáil Éireann Debate, Tuesday - 16 May 2017

Tuesday, 16 May 2017

Questions (328)

Peadar Tóibín

Question:

328. D'fhiafraigh Deputy Peadar Tóibín den Aire Ealaíon, Oidhreachta, Gnóthaí Réigiúnacha, Tuaithe agus Gaeltachta an bhfuil sí sásta bualadh le Comharchumann Inis Mór chun conradh Aer Árann a phlé leo, i bhfianaise na titime atá tar éis teacht ar an méid daoine atá ag úsáid na seirbhíse de bharr an chonartha nua, rud a fhágann nach bhfuil an tseirbhís ag freastal ar an éileamh níos mó, agus go gcosnaíonn an tseirbhís an iomarca airgid ar gach paisinéir taobh amuigh den Oibleagáid Seirbhíse Poiblí (PSO); agus an ndéanfaidh sí ráiteas ina thaobh. [22983/17]

Written answers

Minister of State at the Department of Arts, Heritage, Regional, Rural and Gaeltacht Affairs (Deputy Seán Kyne)

Tá conradh do sheirbhís aeir do na hOileáin Árann aontaithe ag mo Roinn le Galway Aviation Services Limited (ag trádáil mar Aer Arann) don tréimhse 1 Eanáir 2017 go dtí 31 Nollaig 2020. Faoin gconradh sin, tá sceideal cuimsitheach eitiltí á gcur ar fáil ó cheann ceann na bliana. Mar aon le haon seirbhís sceidealta, tá amchlár leagtha síos don tseirbhís seo – amchlár faoina bhfuil socraithe go gcuirfear níos mó eitiltí ar fáil ná mar a bhí á ndéanamh le blianta beaga anuas faoin gconradh a bhí i bhfeidhm roimhe seo.

Bím sásta bualadh le Comharchumann Inis Mór am ar bith.