Vol. 399 No. 11
3 D'fhiafraigh Mr. McGinley den Taoiseach an bhfuil iarratas faighte ag a Roinn maidir le deontas riachtanach feabhsúcháin Choláiste Aodh Mhic Bricne i dTeileann i gContae Dhún na nGall; an dtuigeann sé an phráinn atá leis an obair; agus an gceadófar an deontas gan mhoill.
Tá iarratas ar dheontas ó choiste an Choláiste Gaeilge seo á mheas ag mo Roinnse faoi láthair agus déanfar cinneadh ina leith chomh luath agus is féidir.
Níl cinneadh déanta go fóill agus ba mhaith liom a chur in iúl don Aire, nó b'fhéidir go dtuigeann sé cheana, go mbeidh cúrsa Gaeilge ag tosú ansin i gceann trí seachtainí. D'fhéadfá a rá nach bhfuil aon díon ar an fhoirgheamh. An ndéanfar cinneadh gan mhoill sa dóigh is gur féidir díon úr a chur ar an choláiste sula dtosaíonn cúrsa Gaeilge trí seachtainí agus an lá inné. An bhfuil sé chun cead a thabhairt don chonraitheoir dul ar aghaidh leis an obair?
Thug mise cuairt ar an choláiste sin i mí Mheán Fómhair anuraidh agus tá a fhios agam na fadhbanna atá acu. Ag tús mhí Feabhra i mbliana cheadaigh mé deontas i bprionsabal, ar na coinníollacha seo, go ndéanfaí cibé obair chothabhála a bhí ag teastáil, go gcuirfí meastachán suas chun dáta ar fáil ar an obair riachtanach ar an díon agus go gcuirfí fianaise ar fáil faoi airgead a fuair an coiste faoi pholasaí árachais a bhí acu i ngeall ar dhamáiste don díon, mar aon le sonraí iomlána faoin úsáid a bhaineadh as an airgead sin.
B'fhéidir go gceapfar go bhfuil mise ag cur moille air seo ach ní bhfuair an Roinn freagra ar na ceisteanna seo go dtí 13 Bealtaine. Fuaireamar meastachán suas chun dáta an lá roimhe sin, ar 12 Bealtaine. In a dhiaidh sin, mar is eol don Teachta, bhí orainn moltaí a fháil ó na cigirí áitiúla. Níl cinneadh déanta agam go fóill. Tá a fhios agam cé chomh práinneach agus atá sé ach ba mhaith liom an Teachta a chur ar an eolas gur thóg sé an oiread sin ama orthu an fhaisnéis sin a sheoladh chuig an Roinn.
De réir an méid atá ráite ag an Aire Stáit tá an t-eolas ar fad aige anois — meastachán, árachas, agus mar sin de. Tá an foirgneamh ina luí ansin agus táimid ag fanacht le díon úr a chur air, tá an conraitheoir ag fanacht le tosú ar an obair, agus tuigeann an tAire Stáit chomh maith agus a thuigimse go bhfuil an foirgneamh seo in úsáid, ní amháin mar choláiste Gaeilge, ach mar ionad pobail ag Gaeltacht Theileann. An féidir leis an gconraitheoir dul ar aghaidh agus an obair a dhéanamh. An gcuirfear an deontas ar fáil? An gceadófar é i gceannseachtaine, cuir i gcás?
Tá an Teachta McGinley ag caint faoi thrí seachtainí nó mhí. Tá a fhios agamsa go bhfuil an cheist práinneach, ach ní féidir an milleán a chur ormsa nó ar oifigigh na Roinne os rud é go raibh muidne ag fanacht le freagra ar cheisteanna le trí mhí. Sin chomh práinneach agus a bhí sé. Mar sin féin, chomh luath agus if féidir liom, déanfaidh mé cinneadh.
Tá cúrsa Gaeilge ag tosú ansin i gceann coicíse agus beidh cúrsa eile Gaeilge ann i mí Lúnasa, agus tá an coiste ag fanacht le scéala.
(Cuir isteach.)
Tá mé ag dul ar aghaidh go Ceist a 5 chun an Aire Cosanta.
