Dinny McGinley
Question:7 D'fhiafraigh Mr. McGinley den Taoiseach cad é an dul chun cinn atá déanta go dtí seo maidir le plean forbartha Oileán Thoraí.
Ceisteanna — Questions. Oral Answers. - Plean Forbartha Oileán Thoraí.
Maidir le ceist na saoráidí calaíochta ar an oileán, tuigim nach bhfuil an suirbhé ar dhoimhneacht an uisce a luaigh mé san fhreagra a thug mé ar Cheist Dála ar 11 Nollaig 1990 críochnaithe go hiomlán fós. Faoi mar is eol don Teachta, tá deontas lánchostais de £66,000 ceadaithe ag mo Roinnse do na suirbhéanna éagsúla agus do staidéar mion-samhail.
Tá deontas de £25,000 ceadaithe freisin ag mo Roinnse chun a chumasú do chomharchumann an oileáin stór nua a thógáil agus tá an deontas reachtála a íoctar leis an gcomharchumann méadaithe go £18,000 in aghaidh na bliana le héifeacht ó thús na bliana seo.
Tá mé buíoch den Aire as an méid eolais a thug sé ansin ach tá sé breis agus dhá bhliain anois ó lainseáladh an plean agus is iad na mór-rudaí a bhí ann ná calafort ceart, aerstráice agus, is dócha, bád farantóireachta. An bhféadfadh an tAire aon tuairim a thabhairt cén uair a bheidh aon cheann de na trí cinn seo faoi réir.
Mar a dúirt mé sa fhreagra, táimid ag fanacht le níos mó eolais. Is dócha go n-aontóidh an Teachta liom nár tharla mórán go dtí thart fá 1987-88 nuair a chuir muidne airgead ar fáil le haghaidh an tsuirbhé seo, £66,000, agus chomh luath agus atá an t-eolas breise agam, ní chuirfidh mé moill ar bith air seo agus déanfaidh mé an-iarracht chun an t-airgead a fháil le haghaidh na forbartha seo. Maidir le haerstráice agus aersheirbhís don oileán, tuigim ó Údarás na Gaeltachta go bhfuil an cheist seo á scrúdú fós. Tá súil acu go dtiocfar ar chinneadh sa chás seo gan mhoill.
An mbeidh seirbhís fharantóireachta idir Toraí agus an mhór-thír fá choinne an tséasúir thurasóir-eachta atá ag druidim linn?
Tá a fhios agam go bhfuil fonn ar Údarás na Gaeltachta, agus foinn orainn go léir, go mbeadh an cineál seo seirbhíse ar fáil. Tuigim ó Údarás na Gaeltachta go bhfuil caint-eanna ag dul ar aghaidh idir iad agus comhlachtaí a bhfuil suim acu i seirbhís a chur ar fáil.