Vol. 452 No. 1
11 D'fhiafraigh Éamon Ó Cuív den Aire Ealaíon, Cultúir agus Gaeltachta cé mhéad caiteachais atá ceadáilte aige d'Údarás na Gaeltachta do thógáil spáis monarchan i 1995; agus cé mhéad méadar cearnach a thógfar ar an gcaiteachas sin. [7738/95]
29 D'fhiafraigh Miss Coughlan den Aire Ealaíon, Cultúir agus Gaeltachta cé mhéad caiteachais atá ceadaithe aige d'Údarás na Gaeltachta do thógáil spáis monarchan i 1995; agus cé mhéad méadar cearnach a thógfar ar an gcaiteachas sin. [7702/95]
Tógfaidh me Ceisteanna 11 agus 29 le chéile.
Déantar caiteachas Údarás na Gaeltachta ar thógáil a airgeadú as cuid den soláthar a chuireann mo Roinnse ar fáil faoi fhomhírcheann I.3 den Vóta (£6.25 milliún i mbliana) móide an teacht isteach a bhíonn acu féin (£1 milliún nó mar sin i mbliana). As an £7.25 milliún san iomlán, meastar go gcaithfear timpeall £1.5 milliún ar scaireanna i gcuideachtaí, rud a fhágfaidh thart ar £5.75 milliún le caitheamh ar thógáil agus ar shócmhainní agus maoin a cheannach.
Níl clár tógála an Údaráis le haghaidh 1995 socraithe ina iomlán ag an Údarás go fóill. Mar eolas do na Teachtaí críochnaíodh suas le 1,750 méadar cearnach de spás nua monarchan i 1995.
Thoiligh an Rialtas le déanaí le togra chun monarcha nua de 6,682 méadar cearnach a thógáil do thogra sonrach ar an gClochán Liath, Contae Dhún na nGall a mheastar a chuirfidh 520 post lánaimseartha ar fáil roimh dheireadh na bliana 1999. Beidh gá le Meastachán Forlíontach a chur os comhair na Dála ar ball maidir leis an airgead breise sin.
An bhfuil a fhios ag an Aire Stáit gurb é ceann de na fadhbanna is mó dá bhfuil an tÚdarás ag streachailt leis ná, cé go bhfuil iarratais acu chun tionscail a thosú, go bhfuil easpa spás monarchan ann. Freisin, an bhfuil sé sásta nach bhfuil clár tógála 1995 fós réitithe ag Údarás na Gaeltachta agus muidne trian de bhealach tríd an mbliain.
Táim lánsásta éisteacht le cás an Údaráis. I dtaca leis sin bhí comhráití le déanaí idir oifigeach de chuid mo Roinne agus ardbhainistíocht an Údaráis i dtaobh na ceiste. Tá na hiarratais maidir leis an Údarás á meas ag mo Roinn agus tuigfidh tú mar sin go bhfuil sé róluath a rá cén toradh a bheidh ar an athbhreithniú sin. Ar ndóigh, ní foláir an Roinn Airgeadais a tharraingt isteach sa scéal chomh maith.
Ag dul ar ais chuig an cheist a chuir mé, an bhfuil scéal faighte ón Údarás go bhfuil easpa spás monarchan ag cur siar lonnú tionscal sa Ghaeltacht i láthair na huaire, agus céard atá i gceist aige a dhéanamh faoi seo? Freisin, an nglacann sé leis nach bhfuil sé sásúil ar bhealach ar bith nach mbeadh clár oibre 1995 fós leagtha amach ag an Údarás agus muid ceithre mhí isteach sa bhliain.
Tá timpeall 232,000 méadar cearnach de spás tionsclaíoch á chur ar fáil sa Ghaeltacht ag an Údarás agus tá deich faoin gcéad nach bhfuil líonta. Dá bhrí sin tá spás 23,200 méadar cearnach ar fáil acu anois. Fágann sé sin go bhfuil ganntanas spáis i gceantair áirithe sa Ghaeltacht. Tá gach is féidir a dhéanamh á chomhlíonadh ag an Údarás maidir leis an méid airgid a thugtar dóibh in aghaidh na bliana chun cur leis an spás atá acu agus déanfaidh mise mo dhícheall cabhrú leo an oiread agus is féidir.
An nglacann an tAire Stáit leis nach bhfuil sé sásúil nach bhfuil comhaontas idir a Roinn agus an tÚdarás maidir le clár tógála 1995 agus nach bhfuil sé á chur i bhfeidhm i láthair na huaire.
Níl sé fíor nach bhfuil comhaontas ann. Tá na cúrsaí seo á bplé sa Roinn, agus idir an tÚdarás agus an Roinn. Mar a dúirt mé leis an Teachta déanfaidh mise mo dhícheall chun cabhrú leo.
Ach an cheist atá agam, tá ceithre mhí de 1995 imithe. Dúirt an tAire nach raibh clár tógála na bliana fós socraithe ag Údarás na Gaeltachta, agus nach gcuireann sé air imní nach mbeadh sé sin réitithe agus nach mbeadh sé á chur i bhfeidhm i láthair na huaire ó tharla go bhfuil trian den bhliain caite cheana féin.
Ní féidir liomsa ach no sheacht ndícheall a dhéanamh chun cabhrú leis an Údarás agus is é sin an rud a dhéanfaidh mé, cabhrú leo an líon cuí monarchan a chur ar fáil.
