Michael D. Higgins
Question:125 D'fhiafraigh Mr. M. Higgins den Aire Oideachais agus Eolaíochta an bhfuil sé ar intinn aige teacht i gcabhair ar riachtanais sheirbhísí feabhais do Bhunscoileanna Inis Mór. [7666/98]
Written Answers. - Postanna Breise.
Braitheann soláthar postanna dá leithéid in aon bhliain ar leith ar phostanna breise a bheith ar fáil de thoradh laghduithe ar líon na ndaltaí sa chóras bunscolaíochta. Cheadaigh an tAire a bhí romham mórchuid na bpostanna a bhí ar fáil ón bhfoinse seo don scoilbhliain 1997-98 mar chuid de chomhaontú le Cumann Múinteoirí Éireann faoi shocruithe foirne go ginearálta. Cuireadh 54 múinteoirí feabhais breise ar fáil do scoileanna náisiúnta, don bhliain reatha.
Ní acmhainn dom a thuilleadh múinteoirí feabhais a chur ar fáil do scoileanna náisiúnta i láthair na huaire.
Leanfaidh mé ag athbhreithniú an tsoláthar do limistéar na riachtanas speisialta, an tseirbhís múinteoireachta feabhais san áireamh, lena chinntiú go ndéanfar na hacmhainní uile atá ar fáil a dháileadh ar an mbealach is éifeachtaí. Is féidir liom a dhearbhú don Teachta go gcuirfear na riachtanais atá ag na scoileanna dá dtagraíonn sé san áireamh go hiomlán i gcomhthéacs dáileadh breise ar bith a dhéanfar ar acmhainní feabhais amach anseo.