Dhá chuspóir atá ag an mBille seo. Cumhacht a thabhairt do Chomhairlí Contae agus do Bhárdais airgead a sholáthar i gcóir Scoláireachtaí i Meán-scoltacha nó i scoltacha Gairmoideachais an chéad-chuspóir acu sin. Aontú Aire an Oideachais leis na scéimeanna i gcóir scoláireacht a cheapfas na Comhairlí agus na Bárdais, sin é an dara cuspóir.
Ordú a tugadh sa Dara Dáil a cheaduigh i dtosach airgead a chur ar fáil as na rátaí i gcóir na scoláireacht sin. Nuair a ritheadh, dá éis sin, an tAcht Rialtais Áitiúil (Forálacha Sealadacha), 1923, tugadh an chumhacht chéanna sin ann in Alt a 17. Ach d'aithghairm an dara sceideal den Acht Rialtais Áitiúil, 1941, Acht sin na bliana 1923, agus ar an ábhar sin níorbh fhuláir an Bille seo a rith le cumhacht a thabhairt in athuair do na Comhairlí réamhráite airgead a sholáthar i gcóir na scoláireacht. Ina theanta sin bhí sé riachtanach leis na scéimeanna a bhí i bhfeidhm ó haithghairmeadh Acht na bliana 1923 a dhéanamh dleathach.
Tuairm 6,000 scoláireacht a bronnadh ar fad ón mbliain 1923 i leith de thoradh na cumhachta a tugadh in Acht na bliana sin. Ins an mbliain scoile seo tá scoláireachtaí ar fiú £35,000 iad ag 1,466 duine. Sa mbliain 1943 a bronnadh 340 ceann de na scoláireachtaí sin agus tuairim agus £8,000 is fiú iad. Athnuachaint ar scoláireachtaí a bronnadh roimh an mbliain sin atá sa gcuid eile.
Ní raibh sé d'fhiachaibh ar Chomhairlí in am ar bith scéimeanna scoláireacht a chur i bhfeidhm. Níl sin d'fhiachaibh ortha do réir an Bhille seo ach an oiread. Bíonn furmhór na gComhairlí lán-toilteanach i gcomhnaí scoláireachtai a bhronnadh, rud is léir óna bhfuil déanta le breis agus fiche bliain. Níl comhairle in Éirinn, cé is moite de cheann amháin, nach bhfuil scéim scoláireacht i bhfeidhm acu i mbliana. Níl rud do b'ionmholta ná go mbeadh scoláireachtaí le fáil ag malraigh i ngach ball den tír. Ina ainneoin sin measadh go mb'fhearr leanacht den tsean-nós agus a fhágáil fá na Comhnairlí féin a shocrú ar chóir dóibh airgead a chaitheamh ar scoláireachta nó gan a chaitheamh.
Beidh ar gach Comhairle dréacht dá scéim féin a chur os cóir an Aire, agus ní mór na coinníollacha ar fad a bhaineas leis an scéim a bheith tugtha síos ann. Ní mór eolas a bheith ann fá acfuinn na dtuismitheoirí, fá na hiarrthóirí a gceadófaí scoláireachtaí dóibh agus fá scrúduithe. Tig leis an Aire aontú leis an scéim, maolú nó athrú a dhéanamh ar aon chuid de, sin nó é a dhiúltú ar fad, má mheasann sé na socruithe a bhéas déanta ann a beith mí-réasúnach nó mí-fheiliúnach. Measaim go dtig liom a rá libh nach dóigh gur minic a bhéas ar an Aire scéim a dhiúltadh, ach tuigfe baill an tSeanaid go bhfuil riachtanas lena leitheid de choinníoll a chur sa mBille. Ar chaoi ar bith ní féidir foiréigin imirt ar Chomhairlí maidir leis an scéal, mar ní bheidh d'fhiachaibh ortha leanacht ortha leis an scéim, maran mian leo é. Ní amháin sin ach, tar éis don Aire a bhreith a bheith tugtha aige, tig leis an gComhairle an scéim a chur i bhfeidhm, más rogha leo é (Alt 2 (3)). Gidh go bhfuil an chosaint sin ann, áfach, ní gan údar maith a dhéanfas an tAire leasú nó diúltú ar scéim, ar eagla nach gcuirfí an scéim i bhfeidhm i ngeall air. Bíodh is nach n-aontuíonn an tAire leis an gComhairle fá phoinnte áirithe, ní hionann sin go díreach agus a rá go gcuirfe sé a chumhacht i bhfeidhm. Ní dhéanfa an tAire iarracht ar scéim a athrú ach amháin nuair a bhéas ceist prionsabla ann sin nó ceist éagcóra nó deacrachta a bheith ann maidir le riaradh na scéime. Ach má chinneann. Comhairle ar dhul ar aghaidh le scéim a mbíonn aontuithe ag an Aire léi, ní féidir leo eirghe as an scéim ina dhiaidh sin. Beidh ortha eolas cruinn iomlán ina taobh a fhoillsiú ionnus go mbeidh eolas le fáil fúithi ag tuismitheoirí, ag oidí agus ag gach dream a mbeadh suim acu inti.
Aon trácht dá ndéanfa mise anois ar chumhacht na gComhairlí maidir le clás áirithe ar bith nó comha áirithe ar bith do chur isteach, níl sé ach coinníollach, óir teastóidh ceadú an Aire ón scéim bheacht iomlán chun éifeacht dleathach do thabhairt di.
Ní thairgfidh aon Chomhairle scoláireachtaí do pháistí ar bith ach do pháistí a bhfuil a dtuismitheoirí nó a ngáirdiain ina gcomhnuitheoirí bona fide, ar dháta áirithe, i líomatáiste riaracháin na Comhairle sin. Ní bheidh sé dleathach d'aon Chomhairle a cheapadh gur riachtanach d'iarrthóirí bheith ina gcomhnaí sa líomatáiste ar feadh tréimhse áirithe aimsire —dhá bhliain nó níos mó, abair. Ba leatromach a leitheid sin de choinníoll ar dhaoine a dtugann riachtanais a gcuid oibre ortha bheith ag aistriú o áit go háit.
Is amhlaidh atá na scoláireachta dhá gcur in áirithe do pháistí nach acfuinn dá dtuismitheoirí iad do choinneáil ar scoil go gcríochnuighe siad cúrsa meán-oideachais nó cúrsa gairm-oideachais. Dá réir sin, tá sé d'fhoráil sa mBille go luadhfar i ngach scéim cadé an easba acfuinne a measfar do bheith ina comhartha go bhfuil congnamh scoláireachta ag teastáil. Ach, ina theannta sin, tá sé d'fhoráil sa mBille go bhféadfar gan claoi go dlúth le rialacha chlás na hacfuinne i gcás ar bith inar bh'ionann é sin agus leatrom do dhéanamh. Cinnfidh gach Comhairle ar na teorainn ioncuim nó luacha ion-rátuithe dá líomatáiste féin, agus féadfar na teorainn sin do leathnú do réir líon na bpáistí i muirear áirithe ar bith.
Isé an Roinn Oideachais a stiúrfas an scrúdú chun tástáil do dhéanamh ar ábaltacht na n-iarrthóirí chun sochar do bhaint as cúrsa meán-oideachais nó as cúrsa gairm-oideachais. In aon chás ina mbeidh an caighdeán cáilíochta sroichte ag uimhir iarrthóirí is mó ná uimhir na scoláireacht bhéas ar fáil, déanfar úsáid de thoradh an scrúduithe chun na hiarrthóirí do rangú do réir a bhfeabhais. Tar a éis sin, bronnfar na scoláireachtaí do réir ord feabhais na n-iarrthóirí; ach, más mian le haon Chomhairle a leithéid do dhéanamh, féadfar scoláireachtaí do chur in áirithe do cheanntair faoi leith nó do shaghsanna faoi leith scol—d'iarrthóirí atá ina gcomhnaí i gceanntair tuaithe nó d'iarrthóirí atá ag freastal ar scoileanna beaga nó scoileanna tuaithe, cuir i gcás. Rud eile, féadfaidh aon Chomhairle roinnt áirithe de na scoláireachtaí do chur in áirithe do bhuachaillí amháin nó do chailíní amháin, do réir mar measfaí bheith oiriúnach. Scoláireachtaí a mbeadh claon áirithe leo, freisin—claon i dtreo talmhaíochta nó tíobhais, cuir i gcás— féadfar a leithéidí do thairgsint.
Ní féidir scoláireachtaí do ghlacadh ach amháin i scoileanna ceaduithe, agus tabharfar faoi deara nach bhfuil an Bille seo ag coimeád na teórann do bhí san Acht roimhe seo maidir leis an achar do bhí, an uair sin, i Saorstát Éireann.
An scrúdú tástála agus an caighdeán chun cáilithe, beidh siad coiteann do gach scéim; ach má mheasann aon Chomhairle go mb'fhearr maolú do dhéanamh ar na tástála nó ar an gcaighdeán le haghaidh a líomtáiste féin, géillfear dá dtuairimí cho fada agus is féidir.
Maidir le hullmhú agus le tairgsint scéimeanna agus le soláthar sna Meastacháin le haghaidh scoláireacht a bronnfar nó a hathnuafar, séard atá sa mBille faoi láthair go mbeidh na nithe sin ina bhfeidhmiúcháin choimeádta—rud is ionann agus a rá nach ag an mBainisteóir ach ag an gComhairle nó ag an mBárdas bhéas an chumhacht. Séard do measadh ar dtús go mb'fhusaide an riarachán mura mbeadh ar coimeád ag an gComhairle nó ag an mBárdas ach an feidhmiúchán do bhainfeadh le caiteachais airgid. Ach do fuarthas eolas ó shoin tré mholta do cuireadh i láthair na Roinne agus tré na díospóireachta do rinneadh ar an mBille, agus táim cinnte anois gur b'í an tslí atá tairgthe sa mBille an tslí is lugha deacracht agus is mó éifeacht tríd agus tríd.
An méid airgid a chuirfeas Comhairle ar fáil le haghaidh scoláireacht, an méid scoláireacht a bronnfar agus luach gach scoláireacht, is ar an gComhairle go príomhach atá siad sin mar chúram, agus caithfear cuid mhaith saoirse d'fhágáil ag na Comhairlí i dtaobh na nithe sin—go háirithe ós rud é nach bhfuil na scéimeanna éigeantach ar na Comhairlí.
Mar sin féin, ní mór don Aire féacháil le treoir áirithe do choinneáil ar luacha na scoláireacht, ionnas go mbeidh siad mór go leor le bheith tairbheach agus ionnas nach mbeidh siad cho mór agus go laghdóidh siad uimhir na scoláireacht go mí-réasúnach.
Breathnófar na scoláireachtaí i ndeireach gach bliana, agus ní buanófar ó bhliain go bliain scoláireacht d'aon duine nach mbeidh dul-araghaidh sásúil déanta aige nó nach gcólíonfaidh cibé coinníollacha eile a measfar bheith oiriúnach. Taobh amuigh de sin, beidh na scoláireachtaí ion-choimeádta ar feadh tréimhse áirithe de bhlianta. Ba chóir iad do bheith ion-choimeádta ar feadh a ceathair nó a cúig de bhlianta—go háirithe scoláireachtaí i Meán-Scoileanna. Ní foláir ceadú an Aire Oideachais d'fháil do gach athnuadhadh scoláireachta.
Chífear go dtugann Alt 7 (1) cumhacht do Chomhairlí Contae an t-airgead le haighaidh scoláireacht do chur ar fáil tríd an Ráta Dealbhais. Ní bhaineann an fhoráil sin den Bhille leis na Bárdais. Chun airgead do chur ar fáil don chuspóir seo, tá cumhacht fachta aca-san cheana féin faoi'n Acht oiriúnach Bainisteoireachta Cathrach.
Mar gheall ar an tréimhse atá caithte ó hathghairmeadh an tAcht. Rialtais Áitiúil (Forálacha Sealadacha), 1923, is riachtanach údarás dleathach do thabhairt do Chomhairlí agus do Bhárdais i dtaobh a gcaiteachais agus a ngníomhachta ar son scoláireacht idir an dá linn. Táthar ag brath an t-údarás sin do thabhairt dóibh in Alt a 8.
Táthar ag súil go mbeidh an Bille nua seo ina chongnamh mhór le gléas oideachais do chur ar fáil do bhuachaillí agus do chailíní a chaithfeadh stad go ró-luath de fhreastal scoile mura mbeadh an Bille; agus táthar ag súil go ndéanfaidh gach Comhairle agus Bárdas soláthar fial, do réir a n-acfuinne, le haghaidh na scéim scoláireacht. Ina thaobh sin, chífear nár coimeádadh sa mBille seo an fhoráil, do bhí in Acht 1923, dhá órdú go gcaithfí cead d'fháil ón Aire Rialtais Áitiúil agus Sláinte Puiblí chun ráta ós cionn pingin sa bpunt do thógáil.
Tá súil agam go dtaithneoidh téarmaí an Bhille seo le gach Seanadóir. Tá dóchas agam go dtabharfaidh na Seanadóirí go léir a gcó-chongnamh uatha chun an Bille do chur tríd an Oireachtas gan mhoill, ionnas nach fada go mbídh údarás dleathach ag na Comhairlí agus ag na Bárdais don deagh-obair atá déanta aca agus don deagh-obair a bhfuiltear ag súil léi uatha tré scéimeanna maithe scoláireacht.