Dáil Éireann Debate, Thursday - 1 April 2010
35 D’fhiafraigh Deputy Brian O’Shea den Aire Gnóthaí Pobail, Comhionannais agus Gaeltachta cén dul chun cinn atá déanta maidir leis an reachtaíocht ar an sainmhíniú nua ar an rud is Gaeltacht ann agus ar theorainneacha na Gaeltachta; agus an ndéanfaidh sé ráiteas ina thaobh. [14282/10]
View answerMar is eoil don Teachta, tá an dréacht-Straitéis 20-bliain don Ghaeilge faoi bhráid an Chomhchoiste um Ghnóthaí Ealaíon, Spóirt, Turasóireachta, Pobail, Tuaithe agus Gaeltachta faoi láthair. Cuimsíonn an dréacht-Straitéis seo forbairt córais pleanála teanga chuimsithigh ag leibhéal an phobail sa Ghaeltacht agus moltar inti go mbeidh stádas na Gaeltachta bunaithe ar chritéir teanga. Nuair a bheidh obair an Chomhchoiste thart agus tuairisc faighte ar ais uaidh, tá súil agam an dréacht-Straitéis, agus í leasaithe más cuí, a thabhairt faoi bhráid an Rialtais le ceadú. Is sa chomhthéacs sin a dhéanfar cinnithe maidir leis an gcineál reachtaíochta atá luaite ag an Teachta.
