11 Feb 2019, 09:48
Beidh cruinniú ag Comhchoiste na Gaeilge, na Gaeltachta agus na nOileán Dé Máirt tráth a chloisfidh sé ón Roinn Oideachais agus Scileanna maidir le caighdeánú scrúduithe/cáilíochtaí tríú leibhéal do mhúinteoirí ábhair.
Lena chois sin, déanfaidh an Coiste fiosrú ar na cuspóirí, agus na bearta atá á ndéanamh, ag an Údarás um Ard-Oideachas maidir le seirbhísí Gaeilge agus dátheangacha a sholáthar dá chustaiméirí.
Ag labhairt di roimh an gcruinniú, dúirt Cathaoirleach an Choiste, Caitríona Ní Chonghaile, TD, “Cuireann an Coiste fáilte roimh an deis plé a dhéanamh leis an Údarás um Ard-Oideachas, agus roimh an gcruinniú, tá an tÚdarás tar éis ceistneoir a ghabháil de láimh maidir le húsáid agus cur chun cinn na Gaeilge san eagraíocht acu agus, freisin, maidir leis an soláthar a dhéanann siad ar sheirbhísí trí Ghaeilge.”
Beidh ionadaithe ón gcomhlacht um chaighdeáin ghairmiúla do ghairm na múinteoirí, an Chomhairle Mhúinteoireachta, agus na hinstitiúidí a sholáthraíonn cúrsaí oiliúna do mhúinteoirí i láthair freisin, mar bharr ar láithriú an Údaráis um Ard-Oideachas.
Dúirt an Teachta Ní Chonghaile freisin: “Beidh spéis faoi leith ag na comhaltaí cloisteáil conas a bheartaíonn an eagraíocht méadú ar úsáid na Gaeilge a spreagadh.”
Tabharfaidh Cigire Sinsearach sa Roinn Oideachais agus Scileanna caint don Choiste agus glacfaidh an Cigire páirt sa chruinniú.
Tugadh nóta eolais do chomhaltaí an Choiste inar léiríodh caighdeáin sa Ghaeilge, go háirithe i gcomhthéacs Oideachas Bunaidh do Mhúinteoirí.
Mar fhocal scoir, dúirt an tUasal Ní Chonghaile: “Is deis é a bhfuilimid ag tnúth leis plé a dhéanamh leis an Roinn Oideachais agus Scileanna agus ceisteanna a chur uirthi trí Chigire Sinsearach.”
Tosóidh an cruinniú ar 4 p.m i Seomra Coiste 4, Teach Laighean.
Is féidir imeachtaí an Choiste a fheiceáil beo anseo [nasc].