Comhoibriú Fiúntach Dátheangach idir Comhchoiste na Gaeilge, na Gaeltachta agus Phobal Labhartha na Gaeilge, agus Feidhmeannacht na Seirbhísí Sláinte

Dúirt Cathaoirleach an Choiste, an Teachta Dála Aengus Ó Snodaigh: “Cuireann an Comhchoiste fáilte roimh an bhfíseán seo mar áis agus mar chúnamh do mhná torracha, agus cuireann sé fáilte roimh an leagan Gaeilge den fhíseán atá ar fáil anois do mhuintir na Gaeltachta agus do phobal na Gaeltachta.

Tá an Comhchoiste an-bhuíoch den Fheidhmeannacht gur éist sí leis an gComhchoiste ag na cruinnithe a bhí acu lena chéile, agus go ndearna an Fheidhmeannacht beart de réir a briathair. Is léargas é sin ar cé chomh héasca is atá sé seirbhísí poiblí atá go hiomlán dátheangach a chur ar fáil don phobal, agus molaim an Fheidhmeannacht agus a Príomhfheidhmeannach, Paul Reid, Uasal, as a gcomhoibriú leis an gComhchoiste.

Tá súil ag an gComhchoiste go dtabharfaidh na Comhlachtaí Poiblí eile agus na Ranna Stáit éagsúla an comhoibriú seo faoi deara agus go ndéanfaidh siad amhlaidh, agus seirbhísí poiblí á gcur ar fáil acu do phobal na tíre.”

Is féidir le mná toracha agus leis an bpobal i gcoitinne teacht ar an bhfíseán seo anseo.

Tá 14 Chomhalta, naonúr ó Dháil Éireann agus cúigear ó Sheanad Éireann, mar Chomhaltaí den Chomhchoiste na Gaeilge, na Gaeltachta agus Phobal Labhartha na Gaeilge.