Dáil Éireann debate -
Tuesday, 16 Oct 2001

Vol. 542 No. 2

Written Answers. - Postanna Caillte.

Dinny McGinley

Question:

428 D'fhiafraigh Mr. McGinley den Aire Ealaíon, Oidhreachta, Gaeltachta agus Oileán an bhféadfadh sí a chur in iúl cé mhéad post atá caillte i bParáiste Chloich Cheann Fhaola (Fál Carrach agus Gort a' Choirce) i rith na bliana seo; cad iad na comhlachtaí inar cailleadh na postanna agus an bhfuil aon phleananna le tionscail eile a mhealladh isteach sna ceantair sin; agus an ndéanfaidh sí ráiteas ina thaobh. [24223/01]

Dinny McGinley

Question:

430 D'fhiafraigh Mr. McGinley den Aire Ealaíon, Oidhreachta, Gaeltachta agus Oileán cad iad na tionscail i nDún na nGall ar cailleadh postanna iontu i rith na bliana seo, an uimhir postanna a cailleadh i ngach tionscal; agus an ndéanfaidh sí ráiteas ina thaobh. [24225/01]

Minister of State at the Department of Arts, Heritage, Gaeltacht and the Islands (Ms Coughlan)

Tógfaigh mé Ceisteanna 428 agus 430 le chéile.

Ag tógáil san áireamh an chosúlacht idir an dá cheist atá curtha, ceisteanna 428 agus 430, táthar chun an dá cheist a fhreagairt le chéile mar seo a leanas. Níl aon amhras ach go bhfuil tionchar ag an lagú eacnamaíochta idirnáisiúnta ar fhostaíocht i go leor comhlachtaí ar fud na tíre agus níor éalaigh comhlachtaí i nGaeltacht Dhún na nGall ón lagú eacnamaíochta sin. Tá poiblíocht faighte ag formhór na gcásanna inar cailleadh fostaíocht i gcomhlachtaí agus cásanna eile, ar an drochuair, inar dúnadh comhlachtaí in iomlán. Ba cheart a thuairisciú freisin go bhfuil comhlachtaí áirithe sa chontae ina bhfuil an fhostaíocht méadaithe agus tá dóchas ag an údarás go maolóidh na postanna nua sin an mórthionchar a bhéas ag aon chailliúintí i gceantar Gaeltachta Dhún na nGall don bhliain. Tá an t-údarás, faoi láthair i mbun a shuirbhé iomlán bliantúil ar fhostaíocht iomlán i chuile ghnólucht Gaeltachta agus ní bheidh torthaí an tsuirbhé sin ar fáil go dtí aimsir na Nollag. Ag éirí as na rudaí a tharla le gairid i Meiriceá agus i dtíortha eile, beidh sé ar a laghad an mhí sin sula mbeadh torthaí cruinn ar an suirbhé. Déanann an t-údarás fógra poiblí ag tús gach bliain ar mhéaduithe agus laghduithe sa bhfostaíocht i ngach ceantar Gaeltachta agus beidh an rud céanna á dhéanamh ag tús na bliana seo chugainn. Go dtí sin ní bheadh aon eolas a chuirfeadh an t-údarás ar fáil iomlán agus ní bheadh pictiúr cruinn ar fáil den mhéid atá tar éis tarlú le bliain anuas. Cuirfear an t-eolas atá lorgaithe ag an Teachta chuige a luaithe is a chuirtear le chéile é.